Greg Peterson, Presidente di Aruba Birdlife Conservation:
- Cu participacion di hopi experto internacional
ORANJESTAD (AAN)-- Señor Greg Peterson, Fundador y Presidente di e erganizacion Aruba Birdlife Conservation (ABC), a duna informacion den entrevista cu DIARIO, tocante e prome Conferencia Internacional di Shoco cu lo tuma lugar na Aruba, cu lo ta riba e dianan 7, 8 y 9 lo ta paden, na JOIA Aruba by Iberostar, y dia 10 lo ta den veld.
“Lo tin alomenos 25 orado specializa, di cual 15 lo ta internacional y nan lo bay den detaye, tocante e existencia di e shoco den futuro. E ta bay ta un evento hopi bunita cu pa prome biaha nos ta bay hacie”, señor Peterson a señala.
Señor Peterson a splica cu Aruba so tin shoco, cu ta diferente na un especie cu tin den otro lugar pero cu no ta shoco.
“Esun di nos ta diferente anto nos ta bay mustra esey, ora nan bin akinan otro siman, nos lo tin e DNA di nos shoco, anto nos ta bay wak e ora ey cuanto aña nos shoco ta na Aruba, si ta 600 mil aña of mas, y e sonidonan di e shoco, e grandura di su hala. Nos tin informacion di films cu nos a haci di seis aña largo den e hol di e shoco, con nan ta haya webo, con e baby ta nace, kico nan dune di cuminda, etc. Y nos tin un cantidad di experto, casi tur di nan ta doctor den nan tarea, y nan ta bay intercambia informacion cu nos, kico tur nan a siña”, señor Peterson a duna di conoce.
El a agrega cu esaki ta un proyecto cu Aruba Birdlife ta bezig cu ne pa seis aña largo cu “The Global Owl Project”. “Ya, nos ta bin hunto pa prome biaha pa saca tur e informacion aki. Lo mi aconseha pa tur organizacion, principalmente esnan mas grandi y importante di Aruba manera Triple A, WEB Aruba NV, NV Elmar, pa nan manda alomenos un experto pa bin scucha tur e informacion aki, pasobra nos tin hopi. Nos ta puntrando pa e maestronan di scol y studiantenan di Universidad, tambe pa bin, ademas di e sector hotelero pa manda, por fabor, nan ‘green team leaders’ of otro, pasobra e informacion aki lo ta hopi unico”, Greg Peterson a remarca.
