ORANJESTAD (AAN): Den fin di siman a drenta e informacion tristo, cu e conocido comerciante Albert Mario Reginald Lacle a fayece despues di un lucha contra malesa. Albert tin 73 aña di edad.
Hopi hende conoce Albert como e bendedor ambulante di Lotto pa Deporte riba cayanan, principalmente na Oranjestad. E tabata bende hasta ticketnan loco, pa asina comunidad tin acceso mas facil pa e sorteonan aki.
Ora cu Lotto pa Deporte a transforma su sistema online, tabata Albert hunto cu su ruman tecnico ingenioso, cu a desaroya un sistema cu e por cana rond y bende ticket online. E tempo ey no tabata existo mobile-data ainda di smartphone. El a bin cu un sistema poniendo un VHF-Radio antenna riba un helm tipo ‘hard-hat’, canando cu un bateria recargabel grandi colga na su schouder un banda, y otro banda e aparatonan di comunicacion cu Lotto.
Y asina e tabata cana tur caminda, incluyendo e rutanan di Parada di Carnaval na Playa ta bende su Lotto 5. Anto di leu bo ta tende ta canta “Lotto, Lotto”. El a bira e innovador di Lotto wireless.
Tambe e tabata staciona su van den e tempo ey Fergusonstraat (awor Avenida Milio Croes), cu su sistema wireless ta bende Lotto, y bo no mester ni baha di bo auto. Djis para den rij y cumpra. Tin biaha e tabata bende ticket online hasta na porta di cas.
Su famianan a describi Albert como un homber balente, ehemplar, y sa cu tin di siña traha, ta inovador, pa asina yega na bo cosnan. Albert ta yiu homber di conocido Mario, kende tabatin antes Mai Store como tambe Mai Ice Factory. Na famianan, DIARIO ta extende su mas profundo palabra di condolencia. Entiero lo bay ta Diaranson mainta.
