Dangui Oduber:
- Bestaansminimum a bolbe conoce un aumento
ORANJESTAD (AAN): E costo di bida na Aruba ta keda subi y tin sla di prijs tur caminda. Parlaemtario Dangui Oduber a señala cu net e gobierno cu a priminti di baha e costo di bida y mehora e poder di compra, ta haciendo exactamente lo contrario.
Aumento sin piedad: Aki Parlamentario Oduber ta referi na e costo di bida na Aruba. El a señala cu desde cu e gobierno aki a cuminsa goberna, costo di bida ta subiendo tur luna, luna tras di luna. E cifranan di Central Bureau Statistiek (CBS) no ta gaña: e bestaansminimum ta subi cada bes cu e wordo midi. E indicador aki ta representa e entrada minimo necesario pa un individuo of hogar por funciona dignamente den nos sociedad. E ta ser calcula a base di e costo di bienes y servicionan esencial manera: cuminda, paña, vivienda, transporte y otro necesidadnan basico.
Pa garantisa cu e cifra aki ta refleha e condicionnan economico actual, e gastonan ta wordo ahusta regularmente conforme e cambionan di prijs den e Indice di Prijs di Consumidor (CPI). Esaki ta e prueba mas palpabel cu e costo di bida ta den un aumento constante, afectando directamente e cartera di tur ciudadano.
Cifra Maart 2026: Pa un famia di dos adulto y dos mucha (edad 0-14), e entrada minimo necesario pa cubri e nivel basico di bida a yega na Afl. 5.602 pa luna. Esaki ta un aumento di Afl. 95 compara cu maart 2025, unda e cifra tabata Afl. 5.507. E aumento aki a wordo impulsa primordialmente pa e gastonan mas halto den categorianan esencial; cuminda y bebidanan no alcoholico, cu a registra un aumento di Afl. 71 den transcurso di un aña, mientras cu vivienda a aumenta cu Afl. 14 den e mesun periodo.
E situacion ta bira mas critico ora nos compara e necesidad basico cu e realidad di e sueldonan. Pa un adulto, e bestaansminimum ta wordo calcula na Afl. 2.636 pa luna. E sueldo minimo ta rond di Afl. 1.900. Esaki ta nifica cu e sueldo minimo no ta alcansa pa cubri e gasto di bida di un individuo, lagando un deficit di mas di Afl. 700 mensual. E echo cu e gasto basico pa un persona ta sobrepasa e sueldo minimo cu casi 700 Florin, ta confirma e advertencia di Banco Central: e clase media na Aruba ta desapareciendo.
Cartera Bashi y Prijsnan Halto: Pueblo ta drenta supermercadonan cu miedo, paso e costo di bida ta asina halto cu 100 Florin no tin ningun balor mas. Parlamentario Oduber a enfatisa cu, a pesar di e promesanan di e gobierno di AVP-Futuro pa trece alivio, baha e costo di bida y yena e frishidernan bek , e realidad awe ta totalmente opuesto. Tanto Banco Central como CBS a bolbe confirma cu prijsnan di comestibel a conoce aumentonan drastico y pueblo su cartera ta mas bashi cu nunca.
Unda cu pueblo bira, tin sla di prijs! Prijs di awa y coriente no a baha, mientras e subida den prijs di gas y e aumento diario den cuminda y bebida ta keda strangula e cartera di nos pueblo. E alivio cu tanto a wordo priminti NO ta wordo sinti, al contrario pueblo ta sinti su mes traiciona. Oduber a señala cu awe e frishidernan ta mas bashi cu nunca; nos pueblo a wordo castiga cu aumento di prijs y awendia e poder di compra a bay atras grandemente. Hopi ta esunnan cu mester traha dos trabao pa por yega fin di luna, sometiendo famianan na un stress y presion enorme pa motibo di e costo di bida halto.
Clase Media ta Desaparece: Nada no ta wordo haci pa mehora poder di compra pa esunnan cu ta gana sueldo minimo ni pa esunnan den clase media. Oduber a enfatisa cu Gobierno a lubida riba 80.000 hende na Aruba! Pa e grupo aki, gobierno NO tin ningun incentivo y no a mehora nan poder di compra, mientrastanto e clase media ta desapareciendo dia pa dia.
Mas tristo ta cu gobierno y Minister Wever ta bisa pueblo cu NO tin inflacion, cu ningun prijs na Aruba a subi. Parlamentario Oduber a critica e posicion aki severamente, indicando cu un minister cu no kier acepta y reconoce e "sla di prijs" ta un mandatario totalmente desconecta cu nos realidad.
Surplus pa Gobierno, Sla pa Pueblo: Oduber a nota cu bestaansminimum a bolbe conoce un aumento na maart 2026, kiermen pa famianan sobrevivi na Aruba a bira aun mas dificil y Gobierno ta man crusa. Nos no ta mira accionan pa baha e costo di bida, mehora e poder di compra di esunnan cu mas ta sinti’e den nan cartera.E aña ki mester bini cambio pa asina esunnan mas afecta sinti alivio.
Tur supermercado cu pueblo drenta nan ta mira cara di Geoffrey Wever riba shelf y a haya miedo di haci compras!
Oduber a conclui: Den un pais caminda Gobierno tin mas di 500 miyon Florin di surplus, ta inaceptabel cu tanto hende ta sufri! E prosperidad no a wordo comparti manera a ser priminti.
