Faviënne Thodé a defende su Tesis na titula: 'E costo di servicionan social den maltrato di mucha na Aruba'

ORANJESTAD (AAN) – Diamars 11 di April 2023 tabata un dia special pa Faviënne Thodé, cu ta e dia cu el a bay defende su Tesis cu e tema:

“E costo di servicionan social den maltrato di mucha na Aruba”.

E ta sigui e carera di Bedrijfseconomie, na Universidad di Aruba. E aula di U.A tabata yen cu profesionalnan, famia y amistadnan cu a bin hunto pa presencia e presentacion di Faviënne. El a presenta su Tesis cu un tema hopi importante, cu no tabata facil p’e, pero el a persevera pa completa su estudio cu a tuma hopi di su tempo.

El a conta cu un contribucion enorme di Departamento di Asunto Social, durante su investigacion. Apesar cu e costo no ta precies sino un aproximacion, e ta un estudio “groundbreaking” como e prome estudio relaciona cu e tema di costo di maltrato di mucha na Aruba.

Faviënne ta e prome persona na Aruba y den Caribe, cu ta explora un tema manera costo di maltrato di mucha na Aruba. Hopi pabien na Faviënne y hopi exito den futuro.