Fase 4 di Proyecto Boardwalk Malmok ta cuminsando

ORANJESTAD (AAN): Minister Demisionario Dangui Oduber den e periodo di su gobernacion tabata hiba un maneho di turismo,

dirigi entre otro, riba e mehoracion y proteccion di producto Aruba.

   Durante e periodo aki a institui un comision di infrastructura cu tabata discuti y percura pa duna guia na diferente proyectonan riba e bienestar y proteccion di nos recurso. Manera ta conoci, un di nos isla su producto principal ta nos beachnan den cual mester worde protehi.

   E comision aki tabata consisti di e Ministerio di Turismo, DIP, DOW, ATA y TPEF. Adicional tambe APA y AAA tabata asisti ora cu tabata tin mester di experticio specifico. Ta un gran cantidad di proyectonan pa mehoracion di infrastructura, upgrading y beautification cu a worde ehecuta y cu lo sigui wordo ehecuta e aña aki.

   E proyecto di Boardwalk Malmok a worde parti den diferente fase. Fase 1 y 2 ya caba a worde entrega algun tempo atras y a resulta di ta un proyecto cu miles di local y tambe turista ta haci uso di dje pa ehercicio diariamente.

   Actualmente Boardwalk Fase 3 ta den pleno ehecucion y awe Minister Demisionario Oduber ta contento di anuncia cu Fase 4 ta bay start. Boardwalk fase 4, ta cay den e area dilanti Fisherman’s Hut, cual ta encera:

(*) Restructuracion di e parkeo.

(*) Lo sigui amplia e boardwalk te cu Ritz Carlton.

(*) Lo añadi un localidad nobo di bus stop.

(*) Lo añadi turtle wall pa asina limita vehiculo motorisa riba beach.

(*) Lo brinda mas vegetacion natural den e area.

   E siguiente fase di e area aki tabata pa bin cu un estudio pa identifica, con pa restructura e forma cu botonan ta baha/subi, ya cu actualmente e manera no ta uno cu ta den un forma balansa cu medio ambiente.

   Minister Demisionario Oduber ta contento cu un otro bunita proyecto cual e ta laga atras, lo worde cristaliza y asina keda eleva producto Aruba.