Famoso grupo ‘The Young Voices’ ta subi escenario bek cu ‘The Reunion’

Di decada di 1970 y 1980....

• Lo bay honra nan maestra Maybeline Arends-Croes 

ORANJESTAD (AAN): Un show sumamente grandi ta wordo prepara, unda pueblo lo bay rebiba e momentonan agradabel di decada di 1970 y 1980, cu e famoso grupo di cantante hubenil di e epoca ey.

   Ta trata aki di e presentacion di “The Young Voices: The Reunion” unda casi tur esnan cu a participa den e grupo musical aki lo subi escenario y canta bek tur e cancionnan cu a haci nan famoso, y alavez haci esaki un homenahe special dedica na e gran maestra Maybeline Arends-Croes.  E tabata e motor tras di e grupo hubenil aki.

   Diaranson atardi na Renaissance Convention Center, por a mira Maybeline Arends-Croes rondona door di e integrantenan di Young Voices, manera Lilian Boekhoudt, Mirurgia de Cuba, Sandra Suarez-Croes, Gina Werleman.  Promotor di e show Maria Silva a hiba palabra, y a introduci tambe Carlos Bislip, kende ta bira e director musical di e espectaculo.

   Ta desde cu Maybeline Arends-Croes a wordo honra cu e premio Crioyo di Oro di Go Cultura Foundation, e idea di e integrantenan ta pa regala comunidad un bunita show bek di tempo aya.

   Awor e evento a wordo completamente prepara, y a ricibi e fecha di Diadomingo 22 di November 2026 pa 7:00 pm den Renaissance Convention Center.  Pa dos ora largo lo deleita publico, cu musica cu sonido balansa prepara pa Carlos Bislip y Ivan Quandus, y cu cantamento di the Young Voices.

   E anochi di show, lo tin participacion tambe di Gilda Fernandes, Marcia Saladin, y Violeta Boekhoudt.  E tresnan aki no tabata presente na e conferencia di prensa.

   Publico lo rebiba durante e show aki di e forma unico di canta aki, y lo bay mira con e damanan ta mustra nan gratitud y amor cu nan tin pa tur loke Maybeline a haci pa nan, y tambe pa cultura y musica na Aruba.

   Sandra Suarez-Croes tambe a hiba palabra, indicando cu e anochi ey ta priminti di bira algo grandi, bunita. unda Young Voices a ocasiona furor den pasado pa nan forma di canto, baile, y energia unico riba escenario, ta loke lo wordo rebiba den e concierto aki.

   Poco di historia: Den decada di 1970, Maybeline Arends-Croes tabata lidera e famoso ‘Coro Tutti Frutti’, y na 1978 el a dicidi na scout y escoge algun cantante di e Coro aki pa asina lanta un grupo apart di canto.  Di e forma ey “The Young Voices” a lanta.

   El a pone extra atencion riba e grupo aki, cu training constant pa cu e dominio di bos, tonada, y di e forma ey e grupo poco-poco a cuminza duna presentacion den publico, tambe na Tele Aruba, y posteriormente tambe a bay exterior duna show, na e.o. Republica Dominicana.

   Den e dianan venidero DIARIO lo bin cu declaracion di diferente integrante di The Young Voices papiando di nan experiencia y mas.

   Desde awe Diahuebs, carchi pa e show ya ta wordo bendi, y por haya nan riba e,o. e plataforma di Pay.Aw tambe caba.  Corda cu ticketnan ta limita, pues probecha mesora.

   Riba e potret por mira d.r.p.d. Mirurgia de Cuba, Lilian Boekhoudt, Gina Werleman, Maybeline Arends-Croes, Sandra Suarez-Croes, Maria Silva, y Carlos Bislip.