Asesinato na Zeewijk
ORANJESTAD (AAN): Ya ta cinco siman caba cu e crimen aki a socede, y te cu Diahuebs atardi ainda nada oficial a sali.
Fuentenan a splica, cu esaki tin famia di defunto Frans Angela bastante disgusta, esta cu nan no ta haya ningun reaccion di Ministerio Publico, pa bisa kico ta e causa, kico ta e motibo, y oficialmente ta ken a comete e crimen aki na luna di Maart na Zeewijk.
Mientras tanto, a despedi di nan ser keri Frans caba, te cu el a wordo crema. Pero keto bay nada mas a sali, ni un tiki druppel di noticia di loke a socede.
“Nos como famia tin hopi duele, cu ainda nos curazon ta kibra, y nos no sa kico a pasa cu Frans.”
Francisco ‘Frans’ Angela a wordo haya Diabierna 18 di Maart den oranan di mainta, benta na un forma raro abao net otro banda di caminda di e Santana Catolico na Zeewijk. E siguiente Diamars atardi, Polis a anuncia cu nan a pone man riba dos hende. Recherche via di vocero policial, a confirma dos detencion pa asesinato na Zeewijk.
En conexion cu e caso di asesinato cu a tuma lugar dia 18 maart 2022 Recherche di San Nicolas (DAR-3) a detene un homber di inicial J.N.C.B. di 22 aña naci na Aruba. Tambe a detene e muher W.A.W. di 33 aña naci na Republica Dominicana.
Bao guia di Fiscal y a acompania pa Huez Comisario, Recherche y Polis a tene un razzia na un cas na Cura Cabay Zuid y a detene e dos sospechoso menciona.
Den e cas a confisca algun articulonan cu probablemente por worde uza como evidencia contra e dos sospechosonan.
Mas detaye famianan no a ricibi, y nan ta haya cu autoridadnan hudicial tin di corda cu famianan tambe merece di haya informacion, y no laga nan den ‘scuridad’ asina. E ta algo cruel pa haci cu un famia. Dialuna cu a pasa ya a bira 1 luna desde cu e crimen a ser cometi.
