Un groundhandler na Curaçao a bisa cu ta na Aruba a cera e porta malo
- Nan ta disgusta cu e forma nonchalant di e aerolinea pa atende
ORANJESTAD (AAN): Ta increible pa mira e forma con e aerolinea ta sigui reacciona pa cu e incidente cu a socede abordo di e avion Twin Otter DHC-6 di Divi Divi Air riba Dialuna siman pasa ora cu e avion tabata den final approach pa ateriza na Curaçao International Airport. Vuelo R-283 tabata falta djis algun minuut prome cu e baha, ora cu e porta diripiente na forma violento a dal habri y bay abao.
Pa sorpresa di tur hende, e siman aki Divi Divi Air porfin a duna reaccion y a dicidi pa pusha e culpa riba e pober pasaheronan, indicando cu probablemente ta un pasahero a habri e avion for di paden.
Esey ta algo cu un famia sinta net banda di e porta a desmenti absolutamente riba Diamars durante un entrevista cu un emisora na Curaçao. A papia extensamente di loke a socede paden, con ta tres pasahero a keda wanta e porta pa el a keda cera. Con pilotonan no a ni realisa loke ta pasando. Y despues e silencio hermetico cu e aerolinea a trata di mantene pa loke a socede.
Ora di ateriza: Despues cu e avion a ateriza y a stop riba Plataforma na Curaçao, un trahador di Groundhandler a bin habri e porta. Aki mesora e pasahero femenino a puntre: “Bo a haya e porta cera?” E trahador a contest’e si, cu el a caba di habri e porta.
E pasahero a sigui e ora: “Ah Ok, pasobra e porta aki a habri den laira.”
E trahador su cara a cambia y a reacciona: “Porta a habri den laira cu bosonan? Eh eh, no.” El a core grita na un otro colega para pafo di avion: “Hey, porta a habri den laira cu e hendenan aki, prome biaha cu e cos aki ta pasa!”
Ora cu e pasaheronan a caba di drenta e Bus pa hiba nan e Terminal, e trahador a bay bisa e chauffeur: “Porta a habri den laira cu e hendenan aki!! No por! Ta Aruba a cera e porta ey malo. Aruba no a cera e porta bon!”
Aki e trahador ta referi na empleadonan di e groundhandler di Divi Divi Air na Aeropuerto di Aruba cu ta esun cu tin di cera e porta di pafo.
Despues e piloto a yega na e Bus y na un forma suave a bisa: “Na nomber di Divi Divi, mi kier a yama boso dispensa pa loke a pasa”. Nada mas el a bisa.
Esaki ta loke tin e pasaheronan disgusta, y algun cu a keda cu trauma y no tin deseo mas di bula den avion. Te ainda Divi Divi no a ni yama e pasaheronan pa puntra con a bay cu nan, con a sigui, ni nada mas. Periodistanan cu a yama tambe no a haya ni un contesta di cortesia. Ta bisto cu Divi Divi tin e PR di mas inutil aworaki den aviacion local.
“Nan por a sikiera bel e pasaheronan, pasobra nan tin di corda cu ta pasaheronan ta yuda bo compania bira grandi. Ta cu bo pasaheronan e avionnan por bula. Si bo no tin pasahero, bo no tin vuelo,” e pasahero disgusta a declara na prensa di Curaçao.
El a sigui bisa: “Sikiera Divi Divi duna un tiki atencion y duna respet na bo pasaheronan. Pasobra mi ta haya cu ta un falta di respet di Divi Divi, anto pa nan bin buta awor cu ta un pasahero ‘onbewust’ a mishi cu e porta, y cu e porta a habri”.
“No ta un konopi bo ta primi y habri e porta di avion, toch? Mi ta kere cu tin un handeling pa por habri e porta di avion, y pio ainda cu tin un druk di biento, pasobra corda cu bo ta eyriba, bo tin e presion di biento tambe. No ta zomaar ta pasa mishi cu man di porta pa e habri, no ta un porta di camber,” el a declara.
Reaccion hopi bobo: E relato cu Divi Divi Air a emiti awor di loke a socede, a wordo describi door di e pasahero como “un relato hopi frieu, hopi kens, hopi bobo pa bo ta haci asina cu hende.”
Ta hopi hende mas a keda babuca pa lesa e reaccion infantil di Divi Divi Air riba loke a socede. Nan no por a kere e hipotesis pa cu e incidente aki.
Esnan cu kier scucha e entrevista, y mira un video cu famia tabata grabando door di bentana net ora cu e porta a dal habri, por click na:
Famia ta disgusta cu Piloto no a ni bay check kico ta pasando. Ta danki na un pasahero masculino cu a rek y ranca e cadena/kabel, y e pasahero femenino cu tambe a rek e cadena/kabel pa cera e porta, y un militar (kizas ta Curamil of Arumil) cu a los su seatbelt y a cana bin patras pa asina keda yuda wanta e porta lo mas cera posible te ora cu e avion a stop riba plataforma.
