Famia Real a keda orguyoso cu e mural fabuloso di Armando Goedgedrag

ORANJESTAD (AAN): Tabata un momento special pa e fotografo y artista local Armando Goedgedrag,

ora cu Famia Real a para dilanti su mural di dos bunita blenchi na muraya di refineria na San Nicolas.

   Net ora nan a pasa, nan a haya Armando ta touch-up un tiki su arte, y a combersa cune.  Aki Armando Goegedrag a splica nan di su mural, cu ta mustra dos precioso blenchi bulando enbusca di nectar, cual obra ta un sorto di mensahe directo pa tur hende concientiza con precioso y fragil e naturaleza di Aruba ta.

   Ademas di dos blenchi riba e mural, por mira tambe algun blachi di mata, piedra, y tambe den background por mira e simbolonan tipico cu bo ta haya riba e casnan di antaño na Aruba.

   Un splicacion cu tanto Rey Willem-Alexander, Reina Maxima, y Prinses Amalia a encanta bastante y a felicite cu tur honor pa e bon trabao aki.