ORANJESTAD (AAN) – Señora Ghislaine Koeiman, director di Famia Planea, a menciona den un entrevista,
cu luna di September ta hopi importante pa e institucion aki, pasobra esaki ta e luna di anticonceptivo.
Durante e luna aki Famia Planea ta concientiza comunidad tocante pakico ta importante pa uza anticoncepivo. E ta importante pa e persona cu sa cu e ta sexualmente activo, y no ta cla pa haya yiu ni pa forma su famia aworaki, pasobra e kier haci otro cosnan. Pesey ta importante pa ta proteha.
E luna aki Famia Planea ta para keto y duna informacion tocante e productonan, pasobra con cu bay bin añanan ta cambia, y hopi hende ainda ta pensa cu “tal cos” por hacie malo, of si nan use di mas.
Famia Planea a bin cu informacion, programanan, campaña, y a pone e medionan social full activo, y Famia Planea ta purba di ta mas cerca di e hobennan y di tur nan clientenan.
Uso di preservativo ta un tabu cerca diferente mayor, cu no ta aconseha nan yiunan tocante esaki.
E motibo di esaki ta cu nan mes a haya e informacion aki tempo di nan tempo, segun Ghislaine Koeiman. Y hopi di nan ta bisa na Famia Planea cu “mare nan tabata tin e informacion aki e tempo ey”. Koeiman a agrega cu semper nan a aconseha pasobra nan ta wordo acerca pa hopi mayor y educador, pa un conseho personal, of priva, pa nan bin cu e hoben di 15 aña, pa nan sinta hunto cu nan yiu pa hunto haya informacion.
Koeiman a menciona cu hopi ta pensa cu Famia Planea ta sinta cu hobennan so, pero no ta asina. Nan ta sinta cu mayor tambe. El a bisa cu si tin mayornan cu tin yiunan cu ta haci pregunta cu nan no sa con pa contesta, pa acerca Famia Planea libremente, of tambe mayornan cu mester di un guia of cu tin duda pa informa nan yiu, por ehemplo, con pa preveni embarazo y cu no sa con pa cuminza papia di esey, pasobra sigur no ta un tema facil. Tin mayornan cu ta wak nan yiunan di 15 aña y ainda nan ta wak e baby y ta bira dificil pa nan bisa “ok mi yiu ta creciendo, mi yiu tin un pareha, mi yiu ta saliendo su so cu su amiganan, of e tin un amigo”, e dama a comenta.
Aunke ta dificil ta bon pa papia tocante esaki, y portanan di Famia Planea semper ta habri pa esaki, Ghislaine Koeiman a conclui.
