ORANJESTAD (AAN): Pa medio di esaki, DIARIO ta ofrece disculpa na famia di e recien fayeci Roshan Wernet, como cu un potret inapropia a sali publica na prome pagina.
E potret no ta un ilustracion perfecto di Roshan, como cu e ta un persona hopi alegre. Un deportista multifacetico for di hoben caba, Roshan a logra di sobresali den e.o. deporte di Baseball, y como atletista dedica, el a yega di core caredanan maratonico tambe. Fuera di esey, e ta participa den competencianan di dragrace.
Famia a aclarea tambe cu Patologo a informa nan oficialmente, cu Roshan a fayece na cas mes. E tabata clinicamente morto na cas, aunke a transporte pa Hospital unda a keda practica CPR, y na Servicio di Emergencia cu specialista a trata di haci ultimo intento pa pone su curason haya pulso, pero esey tampoco no a logra y no por a haci nada mas.
Roshan a bay laga su pareha, y su dos yiunan, uno di 6 aña y e otro di 2 aña. Ambos ta su pret’i wowo cu e tabata stima un mundo, y berdaderamente tabata un tata ehemplar pa nan. Su fayecimento a laga famianan cu preguntanan sin contesta, pero ta adora tur e temponan cu el a haci bida di e famia uno hopi feliz.
Na famianan, DIARIO ta manda palabranan di profundo condolencia.
