DIARIO ta sigui e pista di e proteccion di un neishi di Avestrus
*2024 por presenta e ruta scondi pa e neishi di e Avestrus?
*Parlamento di Aruba cu un herida y berguensa historico
ORANJESTAD(AAN)—Si no bini un buelta grandi den mundo politico di Aruba prome cu e fecha cu ley di Aruba ta regla, na 2025 Pueblo di Aruba mester bolbe urna electoral.
Eleccion 2025 na Aruba lo bira uno historico pa e pais cu lo huzga gobernacion riba diferente tereno pero na 2025 sigur a base di desaroyonan cu ta resultado di e segunda tanda di e caso criminal contra Benny Sevinger, cu ta Caso Avestrus.
Informacionnan cu DIARIO a ricibi for di fuentenan bon na haltura, na 2024 Aruba lo cera conoci cu un espactaculo nunca conoci den su historia ora Corte di Husticia mester dicidi riba desenlace di Caso Avestrus den cual un punto lo bira sumamente interesante, sigur pa e momento politico den cual Caso Avestrus a desaroya.
Ya tabata tin dos motibo pa cual segun publico a wordo dicidi pa yama e caso cu Husticia a start contra Benny Sevinger Caso Avestrus, cu ta nomber di e parha cu ta hinca su cabez den santo.
E interpretacion mas costumbra tabata, cu e ta haci manera e no a mira kico ta pasa den su cercania.
Despues a bini e interpretacion cu a nace ora e tratamento den Corte a haya su inicio, cu e avestrus ta busca su cuminda bou suelo, loke tambe ta berdad.
“Pero tin un motibo mucho mas grandi cu un avestrus ta traha un buraco den suelo, cu ta loke e ta haciendo realmente,” un informante ta indica.
“E avestrus ta traha un pasashi secreto pa su neishi bou suelo y asina e ta sconde su neishi na un lugar dificil pa otro yega y descubri su webonan,” un informante a mustra.
Esaki ta e parti mas interesante di e caso, cu ainda lo conoce hopi sorpresa cu por afecta mundo politico di Aruba y sigur e partido AVP, di cual e dirigente Mike Eman a dicidi cu e ta prefera pa su partido spart for di otro, cu pone un fin na su sosten directo na Benny Sevinger.
“Mike Eman a logra te awor loke e tabata kier. E hecho cu un persona cu a wordo condena dor di Huez ta oficialmente representante di Aruba, a bira algo cu Pueblo mester acepta,”informantenan ta indica.
Benny Sevinger, oficialmente condena den Corte di Husticia, a haya un privilegio unico, pa motibo cu su partido a inactiva e condena di Huez temporalmente, y mantene Benny Sevinger den su puesto pasobra su caso ta den apelacion.
Mike Eman, tabata Ministro Presidente di e Gabinete den cual Benny Sevinger tabata Ministro pero segun desaroyo oficial di e caso, Mike Eman no tabata sa cu den e grupo directo di Mike Eman, un crimen tabata desaroya.
For di tratamento di e caso den Corte por conclui cu Mike Eman no tabata conoce e neishi di Avestruz cu tabata desaroya na Aruba, na momento cu financieramente Mike Eman tabata hiba Aruba na desastre financiero cu intervencion directo di Reino mester a evita.
Mike Eman como dirigente di Gobierno y di su partido a faya den descubrimento di existencia di un neishi di Avestruz den su gobierno y su partido.
Ora e berdad a rementa y a conduci na condena di Huez y awor exodo di miembronan cu ta bandona su partido, Mike Eman a duna sosten total na Benny Sevinger cu ainda ta Miembro di Parlamento di Aruba.
“E caso aki no a termina, pero ta bay bira uno di e desaroyonan politico mas importante di 2024 na caminda pa 2025 ora Corte di Husticia trata e segunda tanda den Caso Avestrus cu ta e tratamento den apelacion cu tanto Benny Sevinger como Ministerio Publico a bay,”informantenan ta trece dilanti.
Loke awor ta wordo silencia cu aceptacion silencioso di un persona condena pa crimen den Parlamento, lo bira argumento pa desaroyonan politico cu por spera.
Na caminda pa eleccion 2025 tratamento di e caso Avestrus den apelacion segun informantenan importante, ademas lo tin efecto pisa riba votadornan ora mas detayes wordo duna di un caso criminal spectacular cu, sinembargo, no ta parce di tabata tin resultado pa Benny Sevinger cu a base di decision di su partido a usa e posibilidad di apelacion pa mantene su puesto di representante di Pueblo den Parlamento.
Segun informantenan Aruba lo conoce varios desaroyo y cambio interesante den su campo politico na caminda pa eleccion ora Pueblo di Aruba dicidi riba e berguensa mas grandi den historia di Aruba cu e grupo di Mike Eman den AVP a alcansa cu sosten di Benny Sevinger den Parlamento contra orden di Huez.
