Famia di DIARIO a dispidi di su colega stima Irena Croes

ORANJESTAD (AAN) – Diahuebs merdia e famia di DIARIO, tabata tin un momento hopi agradabel, cu sentimentonan mixto di un banda pasobra nos a dispidi di un colega hopi stima,

cu durante traha 30 aña a forma parti di nos personal, y ultimo temponan a maneha DIARIO su administracion na un manera excelente; y di otro banda hopi contento p’e pasobra mientras e ta yama nos ayo, e ta wordo yama bon bini na un hopi bon oportunidad di progreso, cu sin duda e lo no por keda sin acepta.

            Irena a haya un regalo cu ta hiba e curazon den dje di nos tur, y el a expresa palabranan di gradicimento na DIARIO, y na tur colega cu kendenan a pasa den momentonan sublime pero tambe di reto, por ehemplo den e temporada di covid y su efecto riba henter Aruba sin laga DIARIO afo.

            El a desea nos tur, tur cos bon pa nos y DIARIO sigui bay dilanti cada dia miho y miho. Famia di DIARIO tambe ta desea Irene un futuro hopi prometedor, mirando su conocemento y experiencia cu, manera el a expresa, el a siña na pia di trabao den DIARIO.

            Nos lo sinti falta di su caracter alegre, su jokenan cu ta pone nos hari, y sin duda algun su nobleza!