Famia a organiza un encuentro pa recorda y dispidi di Dino Tromp y cera un etapa hopi dificil

ORANJESTAD (AAN) – Ivan Tromp, cu ta e di dos yiu di e colega di prensa Dino Tromp, cu a fayece dia 28 di mei 2022, inesperadamente, na Hulanda.

Ivan a relata cu a tuma e famia un luna pa trece su restonan mortal na Aruba, y den tur e momentonan ey, e hunto cu su mama y su rumannan a ricibi palabranan di condolencia, sosten y apoyo den un situacion nada facil pa e famia. Tur e muestranan di condolencia, sosten y solidaridad, tur persona cu a yuda nan, nan ta gradici hopi. Tur esnan cu a acerca Ivan bise “ey mi a conoce bo tata” of cu nan no tabata sa cu Dino ta su tata. El a reitera su palabranan di gratitud pa un y tur den nomber di su mama, rumannan y henter famia.

Esaki tabata un oportunidad pa tur hende por a dispidi di Aldino (Dino) Tromp y asina e famia cera un etapa di dos luna hopi dificil. Dino semper ta keda den nan mente y curazon cu tur e cosnan bon cu nan a siña di nan tata. Asina Ivan a expresa.

Ivan ta describi su tata como un persona hopi alegre, cu un trayectoria hopi largo den prensa, despues cu el a sali for di Arugas. El a cuminza na Tele Aruba te cu na ultimo el a termina como fotografo. El a traha tambe na diferente corant. Dino semper tabata cla pa yuda tur hende, un persona hopi conoci y bon recorda. Tur hende cu pidie un fabor nunca el a nenga; e tabata gusta lama, gusta pisca, y tabata tin un stimacion grandi pa su famia, su yiunan, su nietonan. Ivan a bisa cu e tabata gusta su caya tambe, y pesey nan a pone un boter den e despedida aki.