Famia a bira feliz y contento cu Tara van der Werk a bay cu e corona

ORANJESTAD (AAN): Na momento cu Diadomingo anochi e certamen di Miss Teen Aruba International 2025 a

culmina cu e anuncio di Tara van der Werk como e ganadora maximo di e certamen, por a tende con publico a bira loco di felicidad y euforia.

   Riba escenario, Tara van der Werk a pone su mannan riba su cara, yorando di alegria y ricibiendo felicitacion mesora di Abigail Sanchez kende a sali prome finalista.  Su fanaticonan tur a core yega cerca di escenario pa asina keda bula y grita di felicidad.

   Tara van der Werk a haci un bon trabao durante e certamen.  A participa bon den e shownan di paso rapido di baile, cu coreografia perfecto, a duna bon presentacion den trahe di baño y tambe cu su trahe di gala, cada biaha cu sonrisa riba su cara.  Aki por mira mas di e felicidad cu a draai rond di Tara na final di e certamen, y ricibiendo felicitacion di su mama Judelca Briceño y tata.