Segun Miriam Dabian di Aruba Food & Beverage:
ORANJESTAD (AAN): Den un entrevista cu DIARIO, señora Miriam Dabian di Aruba Food & Beverage Association (AFBA) a elabora riba e dificultadnan pa haya personal den e sector turistico y e impacto cu esaki tin riba e operacion di companianan.
AFBA a organiza su di cinco job fair cu e obhetivo di haya un bista mas cla di e cantidad di hende cu ta buscando trabao den e sector y, na mes momento, contribui na cubri e vacantenan existente. Dabian a enfatisa cu e necesidad di personal ta bira mas urgente cu e temporada halto cu ta drentando.
Mas ainda, el a remarca, cu mester parti e trabao den menos ora pa siman pa acomoda segun e capacidad di trabao cu tin. Esaki ta haci cu mester di mas personal pa cubri e puestonan di trabao cu tin.
Durante e job fair a resulta cu hopi persona no ta dispuesto pa traha fin di siman, shift of riba dianan di fiesta. Segun Dabian, esaki ta un tendencia cu ta manifesta specialmente entre hobennan, kende no semper ta adapta na e horario cu e sector ta exigi. El a subraya, sinembargo, cu no ta trata di un fenomeno exclusivo di Aruba, sino di un tendencia mundial.
Na Aruba, e crecemento di turismo y e necesidad di mantene un bon nivel di servicio ta haci cu e falta di personal ta wordo sinti cu mas intensidad. Segun Dabian, contrario na añanan anterior unda Aruba tawatin temporada abou y temporada halto, esaki no ta e caso mas pasobra e demanda turistico ta keda halto practicamente henter aña, y esaki ta haci e situacion mas dificil.
E situacion aki ta dificulta tambe e planificacion di vakantie di empleadonan, ya cu hopi compania no tin suficiente personal pa cubri nan ausencia.
Dabian a indica cu durante e ultimo aña, AFBA a haya mas oido di parti di DIMAS y minister Dowers pa atende algun di e obstaculonan cu e sector ta confronta, mientras ta sigui busca solucion pa e escases di personal. El a agrega cu, si no tin suficiente trahado disponibel localmente, lo mester recuri na busca personal di exterior.
Ademas di e dificultad pa haya personal local, Dabian a trece dilanti e situacion di varios trahado di exterior den e sector di horeca cu, apesar di tin nan permisonan, ainda no ta registra na Censo y hopi ta regresa nan pais.
Segun su splicacion, e falta di registracion ta crea obstaculo pa inclui e trahadonan aki den payroll, habri un cuenta di banco y inscribi na AZV. Como consecuencia, nan ta wordo paga den cash y ta keda den un posicion vulnerabel. Dabian a expresa preocupacion especialmente pa casonan den cua un trahado bira malo y no tin e recursonan necesario pa cubri su gastonan medico.
Por conclui cu e situacion ta resalta e necesidad di un esfuerso conhunto entre e sector priva y autoridadnan pa atende tanto e falta di personal como e obstaculonan administrativo, cu atencion pa e continuidad di bon servicio y e bienestar di trahadonan.
