Manera DIARIO a adverti Coronapas ta bira un yabi falso pa infeccion - E paharito berde ta sconde e presencia di e malesa na publico - *Prevencion importante ta wordo elimina cu un pasaporte cu por ta falso
ORANJESTAD(AAN)—Cu logica como uno di e asesorionan humano mas importante, a bandona mundo, atrobe ta wordo comproba.
Mientras e pandemia Covid-19 ta sigui plama rond mundo y ta sigui menasa bida y bienestar humano, politiconan sabi na entre otro Hulanda, a introduci e Coronapas.
“Deus ex Machina” ta e palabranan Latin cu ta wordo uza pa un salbabida pa obranan clasico teatral di antiguo Grecia y Roma.
Un autor di e tempo, cu no tabata sa con presenta un solucion pa un situacion cu a pega, tabata inventa un dios cu tabata subi escenario.
Cu e Coronapas por a bira e yabi pa politiconan habri e porta pa deshaci di medidanan preventivo fastioso pero sumamente importante pa scapa bida, ta algo cu DIARIO a adverti na momento cu Hulanda a dicidi cu entrante 25 di September proximo, e lo deshaci di un parti importante di su prevencion contra Covid-19.
Con pelitgroso esaki ta, a keda splica dor di DIARIO, cu a mustra riba e peliger cu esaki indirectamente lo tin pa Aruba, cu ta ricibi cantidad di turista for di Hulanda pero tambe conoce un cantidad sumamente halto di persona cu a pesar di e pandemia ta sigui biaha pa Europa.
No ta solamente Hulanda pero cantidad di otro pais, ta uza e Coronapas como nan “Deus ex Machina”, e dios cu nan a fabrica pa asina scapa di e presion di personanan cu ta contra medidanan preventivo di Covid-19, cu aparentemente ta prefera libertad sin ningun rienda, riba nan bida y bida di otro persona.
Ayera DIARIO a haya rason riba otro tema, cu nos a presenta a base di investigacionnan cu nos ta haci pa por analisa, resumi y presenta na Aruba informacionnan di topico importante pa bienestar di Aruba y di e Arubiano.
Hulandes mester a admiti cu e Coronapas ta wordo falsifica, loke ta haci cu tin hende ta presenta e Coronapas como nan yabi pa acudi na tur e actividadnan cu ta bira posibel atrobe pa tur hende cu por presenta nan Coronapas, cu mester ta prueba cu nan ta vacuna y asina portador di proteccion contra Covid-19.
Autoridad na Hulanda a bay mas leu den nan informacionnan cu ta mustra, cu un persona por tin un Coronapas den cual e paharito berde ta mustra cu e no ta infecta, aunke mientrastanto el a wordo contagia cu e malesa.
Cu otro palabra, un persona cu a haya Covid-19, ta portador di e malesa cu e por transmiti pa otro hende, no por cambia e pasaporte pa bisa cu e ta infecta y capaz di pasa e malesa pa otro hende inocente na eventonan, caminda medidanan preventivo importante ta desaparece entrante 25 di September 2021 na Hulanda.
DIARIO awe ta ripiti su advertencia pa no habri caminda pa Covid-19 cu e aceptacion ciego di e Coronapas na Aruba, cu ainda tin un cantidad halto di persona hospitalisa mientras mundialmente e coronavirus nobo ta sigui avansa.
Hulanda no ta deshaci di su “Deus ex Machina” su dios Coronapas cu cual e ta soluciona e presion enorme di personanan contra medidanan preventivo di e Coronavirus nobo.
DIARIO ta sigui acumula tur informacion riba e tema aki, debi na e menasa serio cu Coronapas por bira den prevencion di e malesa cu mester di un solo persona cu ta uza yabi falso di informacion falsifica of incorecto, pa causa mas desaster pa nos comunidad.
