10 di September Polis na cas di Farrah Boekhoudt pa “Diamante” - *Publicacion Farrah riba “Aloe” tres dia despues di bishita di Polis - *Ministerio Publico no ta fuente di Farrah pa informacion “Aloe”
ORANJESTAD(AAN)—Tabata dia 10 di September 2021 cu Polis di Aruba a presenta na dos cas na Aruba.
For di e cas cu ta residencia di e periodista Farrah Boekhoudt, autoridad a bay cu documentonan den cuadro di e investigacion cu a bira conoci como “Caso Diamante” y cu ta basa riba posibel malversacion di placa di e fondo di Parlamento cu tabata destina pa e partido POR.
Den e caso aki, nomber di Alan Howell, cu tabata fungi na e momento como representante di POR den Parlamento y asina a wordo asigna cu e tarea di Vice Presidente di Parlamento, ta central.
Dos dia despues di e suceso aki, dia 13 di September 2021, Aruba por a tuma nota di un publicacion di E Arubiano News di Farrah Boekhoudt, cu a hala hopi atencion.
Den e publicacion a wordo papia di un investigacion cu e nomber “Aloe” cu lo a wordo confirma dor di vocero di Ministerio Publico.
Un cantidad di informacion a wordo presenta dor di “E Arubiano” riba e caso aki cu lo ta trata un investigacion na DIP pa asunto di tereno y den cual “E Arubiano” ta lansa informacion pisa.
Un desaroyo straño den bista di DIARIO, si tene na consideracion cu dia 10 di September autoridad a presenta na cas di Farrah Boekhoudt pa e caso Diamante y cu dia 13 di September e publicacion di Farrah Boekhoudt cu ta bisa cu el a haya confirmacion di Ministerio Publico riba e Caso Aloe.
Un coincidencia cu DIARIO finalmente a presenta tambe na Ministerio Publico ya cu pa DIARIO tabata algo incomprendibel cu Ministerio Publico a presenta e informacion solamente na Boekhoudt y no na otro miembronan di comunicacion.
E vocero di Ministerio Publico a indica na DIARIO cu na Juni, autoridad a informa Aruba cu autoridad a bishita DIP y cu autoridad a bay cu un computer y documentonan.
Ningun momento Ministerio Publico a duna e investigacion un nomber. Ora Farrah Boekhoudt a acerca Ministerio Publico riba e caso, el a presenta e nomber di “Aloe” cu a resulta di tabata berdad den e caso, cu awor a cambia di nomber.
Despues e vocero di Ministerio Publico tambe a tuma nota cu Farrah Boekhoudt a publica un relato largo riba e “Caso Aloe”.
Manera Ministerio Publico a declara na DIARIO, e informacionnan extenso di Farrah Boekhoudt no a bini di Ministerio Publico y cu awor mester bay mira si Farrah Boekhoudt ta splica kende a fungi como su fuente riba e caso “Aloe”, cu ya lo no tin e nomber di Aloe.
E vocero di Ministerio Publico no a revela e nomber nobo di Caso Aloe, cu manera el a mustra ta un caso bou investigacion di Ministerio Publico.
E informacionnan di Boekhoudt riba e caso dia 13 di September 2021, despues cu autoridad a bishita su cas dia 10 di September y confisca material den e “Caso Diamante” pues no ta di Ministerio Publico.
