FADA a lansa di cinco edicion di documentarionan basa riba bida real

ORANJESTAD (AAN): Rulienne Arends, trahado preventivo na Fundacion Anti Droga Aruba (FADA) a splica cu nan ta cla a lansa un temporada nobo di un documentario basa riba bida real.  

Esaki ta bira e di cinco aña cu FADA ta presenta un documentario basa riba bida real, cu ta un otro forma pa un persona conta nan storia, y esaki por yuda un otro persona cu por ta pasando den dificultad, sea cu adiccion y salud mental.

Arends a indica cu e aña aki tin tres persona cu tabata dispuesto pa conta nan storia, loke nan a pasa aden, y por ta den loke ainda nan ta pasando aden. Un di e storianan ta enfoca riba adiccion, kico ta e factornan cu a causa cu e persona a usa substancianan pa asina por enfrenta loke tabata pasando cu ne. Den otro storia, un persona lo conta su experiencia relaciona cu salud mental, y kico tabata e factornan di riesgo. E di tres storia ta relaciona cu un persona cu algun aña atras e tabata na caminda pa trabao y con un persona bao influencia di alcohol a causa dalmento frontal cu su vehiculo. E lo conta con te dia di awe e ta pasando den duro pa motibo di e accident.

E tres personanan aki tabata dispuesto pa conta nan storia pa yuda trece concientisacion den comunidad. Ta trata di storianan hopi impactante cu mensahenan hopi fuerte pa comunidad.

Arends a bisa cu nan ta encurasha tur hende pa wak e programa aki y ya nan a saca e prome 'trailer' di e prome episodio di e documentario. Esaki lo tuma lugar un biaha pa siman riba fechanan 26 di September, 3 y 10 di October pa 9'or di anochi y lo ta obtenibel riba tur plataforma cu ta sostene FADA.

E documentarionan basa riba bida real ta un di e campañanan mas grandi di FADA pa trece mas concientisacion den comunidad.