ORANJESTAD (AAN): Departamento di Asuntonan Economico, Comercio y Industria y su unidad Exprodesk den colaboracion cu Ministerio di Asunto Economico,
Comunicacion y Desaroyo Sostenible ta organisa Aruba Showcase Event II- Promocion y Exhibicion di productonan di Aruba y oportunidad pa promocion di Bo producto via e ‘Webpage Aruba Showcase’ na Plaza Comercio dia 9 di november 2024 di 6:30pm pa 9:00pm. Entrada lo ta completamente gratis! 'N Fuzion lo t’ey pa duna ambiente y entretene publico presente. Bar y cushina lo ta bon surti.
Pueblo di Aruba, prepara pa un evento espectacular cu lo resalta e variedad di productonan produci localmente. ‘Aruba Showcase Event II’ ta bay ta un celebracion, brindando pueblo di Aruba e oportunidad pa bin explora e diversidad di productonan di calidad halto cu Aruba tin pa ofrece. ‘Aruba Showcase Event II’ kier fungi como un plataforma unda negoshinan local por exhibi y potencialmente bende nan producto, contribuyendo na Aruba su economia y cultura vibrante y asina refleha e creatividad y innovacion di empresarionan Arubano.
‘Aruba Showcase Event II’
- Exhibicion di productonan “Original di Aruba”: tur presente lo tin e oportunidad pa experencia pa nan mes y cumpra un variedad di articulo produci localmente, cu ta e.o. pica, cosmetica (habon, makeup, desodorante, proteccion solar, etc.), chuculati, productonan masculino pa barba, siga completamente produci na Aruba, obranan di arte, diferente biña y likeur di casho y honing, tequila di mango y coco traha cu awa di nos lama, prendanan di glas di lama, badpak, paña y acesorio di moda (sostenibel) y mucho mas.
- Webpage Aruba Showcase: oportunidad pa productonan “Original di Aruba” bay riba e ‘Webpage Aruba Showcase' cu lo brinda un plataforma digital pa tur negoshi local promove y bende mas producto despues di e evento. E webpage tin como meta pa conecta nos negoshinan local cu un audiencia mas amplio y asina fomenta crecemento economico y amplia e alcance di nos productonan local riba nivel mundial.
Ainda tin oportunidad, pa tur negoshi cu tin un producto local, pa expone esaki riba e ‘Webpage Aruba Showcase'. Pa por considera bo negoshi of producto como ‘di origen local’ tin algun rekisito cu mester cumpli cu ne. E rekisitonan cu ta necesario ta lo siguiente:
- Negoshi local mester ta registra na Kamer van Koophandel (KvK) y/of tin un vestigingsvergunning di Departamento di Asuntonan Economico, si ta aplicabel;
- Producto mester ta completamente original di Aruba (materia prima y e producto final ta traha/transforma/procesa na Aruba);
- Den caso cu e producto NO ta completamente original di Aruba, e mester ta ‘transforma/procesa’ na Aruba (e materia prima lo por bin di afo pero e producto final mester ta traha/transforma/procesa na Aruba).
Pa registra pa e oportunidad aki lo mester manda un e-mail pa: This email address is being protected from spambots. You need JavaScript enabled to view it..
Loke ta necesario pa registra ta:
- Un descripcion di e producto (maximo 150 palabra);
- Potret di e producto;
- Informacion di contacto, links di e website y/of Facebook y/of Instagram;
- “Letter of Consent” yena y firma. (Lo manda esaki via e-mail na momento cu registra).
