ORANJESTAD (AAN): Cas di Cultura cu sosten di Cultuurfonds Caribisch Gebied ta presenta e coleccion di obranan nobo di e artista local Belinda De Veer.
E obranan sorprendente aki a ser crea den ultimo dos aña y ta contene un mensahe profundo di e amor, erotismo, y transformacion.
Di e forma aki e imaginacion artistico di Belinda ta transporta nos via e obranan di arte den un narativa yena cu sensualidad y ternura. Specialmente na e momentonan aki di conflicto y polarisacion global Chimera ta ofrece un antidoto necesario. E idea di amor, enredamento, y transformacion ta specialmente valido na e momento aki, caminda diferente tipo di guera ta tumando luga den e experencia mundial di tur dia, causando victima, polarisacion y caos.
Expo di Belinda de Veer, carga cu simbolismo di deseo erotico, por ser mira manera un invitacion pa biba bida na su maximo. Pa medio di su arte, e brasa ritual aki, e curpa, intimidad y conexion ta wordo celebra. Chimera lo ta habri pa publico den e sala di exposicion for di 9 Mei te cu 2 di Juni na Cas di Cultura.
