Exposicion di arte color blow a wordo presenta na Biblioteca Nacional

ORANJESTAD (AAN) – Biblioteca Nacional na Oranjestad, a organiza riba Diaranzon di e siman aki, un exposicion di arte, di grupo.

E grupo a consisti di 17 talento, entre artista, artesano, fotografo, entre otro.

Bibliotecaria Gina, a duna DIARIO e siguiente informacion:

Biblioteca a pasa den un temporada cu poco exposicion, debi na e situacion crea pa Covid-19, y awor a sinti e necesidad di bolbe bin cu esaki y tambe pa e artistanan y artesano eyfo sa cu e espacio ta disponible ya cu Biblioteca kier atrae nan. E otro aspecto ta cu tin hopi artista y artesano cu no tin un coleccion grandi cla pa pone den exposicion, sino cu tin un of dos obra.

Biblioteca a bin cu un concepto hopi simple di color primario. Pesey e obranan tabata di color blow y aki tres siman lo tin un coleccion di color cora. Asina, door di forma un grupo a logra presenta un  exposicion, cu ta keda habri pa tres siman, te diabierna 7 di October, y pa dialuna siguiente lo cambia e obranan, y e coleccion ta bira color cora.