ORANJESTAD (AAN): E exportacionnan realisa den luna di januari ultimo for di e Muelle Artesanal di La Vela di Coro, na Falcón,
pa e Islanan ABC (Aruba, Corsou y Boneiru) a triplica compara cu e mesun luna di 2024.
Segun cifranan suministra pa e vicepresidente di e Camara di Comercio y Turismo di La Vela, Juan Gotopo, na januari tabata comercialisa 340 ton di mercancia na e islanan di Caribe Hulandes, compara cu 90 ton exporta den e mesun luna di 2024.
Gotopo a indica cu di e 340 ton aki comercialisa luna pasa, 76,47% (ekivalente na 260 ton) a wordo manda pa Aruba, mientrastanto e otro 23,53% (ekivalente na 80 ton) a wordo comercialisa na Corsou.
E dirigente gremial a bisa tambe cu e actividad comercial a incrementa for di november di 2024, despues di un bahada den e lunanan di september y october.
For di mei di 2023, e periodo cu e frontera maritimo a habri bek, tabatin periodonan di aumento den e exportacionnan. Un ehempel di esaki ta e cifranan di september y october di 2023, cu 590 y 555 ton respectivamente, y na augustus di 2024 cu 545 ton, segun un nota di prensa di e medio digital 'Ultimas Noticias'.
