Dr. Jenny Montiel, coordinadora:
*Completamente gratis y sumamente importante
ORANJESTAD (AAN) – Dokter Jenny Montiel, coordinador di Expo Health Aruba, a duna di conoce den un entrevista cu DIARIO, cu e evento aki lo tuma lugar dia 29 di September awo, na Hyatt Place Aruba Airport, di 10 or di mainta pa 5’or di atardi, y e entrada ta completamente gratis.
Montiel a bisa cu su mision den e movimento healthy aki ta e parti di salud, considerando cu e salud ta e activo mas precia cu nos tur tin.
“Si nos no tin salud, nos no tin nada. Ta importante pa nos tuma e caminda di salud aki, pa nos por funciona bon. Y no solamente nos como adulto, pero tambe henter famia, desde e señora na estado, e mucha, e welo. Nos tur mester subi riba e caminda di salud, pasobra e ta importante y esaki ta e razon di ser di e comunidad aki den cual nos ta, cu ta e movimento healthy. E ta importante si nos kier reforza nos salud aki, na e isla di Aruba”, Dokter Montiel a reitera.
El a menciona cu durante e Expo Salud aki lo ta presente Theta Healing Center, unda ta bay papia tocante salud preventivo y e ocho pilarnan di salud, lo tey tambe Xavier University cu su diferente extension di salud, ademas lo participa doctor Alvarez, entre otro, y tambe un Naturopata, un psicologo di e Centro di Desaroyo Humano, Odontologia, y e parti di evaluacion door di un Optometra.
Montiel a menciona cu e aña aki a separa e temanan. Tin e parti di salud, e aspecto comercial, ehercicio y charlanan.
“Nos ta bay tin un lugar na unda e parti di salud den cual ta bay imparti charlanan educativo pa comunidad, prevencion di salud, y relaciona cu hende muher con pa ta bon. Nos como hende muher, loke ta trata e parti emocional, entre otro aspectonan” Dr. Jenny Montiel a señala.
E dama a expresa cu den e temponan aki, e salud ta hopi deficiente na nivel mundial, pasobra e no por bisa cu ta solamente na Aruba, sino cu henter mundo, algun pais mas cu otro.
“Aki, na e isla di Aruba, nos tin un estadistica halto di obesidad y sobrepeso. Nos sa cu obesidad ta e base di hopi malesa, manera presion halto, resistencia na Insulin, Metabolic Syndrome, problema di Tiroide, Diabetes, y despues cu e tipo di malesanan aki ta instala, e complicacionnan ta bin. Nan por ta reversible si ataca nan na tempo, pero ta ireversible si ta duna tempo largo na e patologianan aki”, Dr. Montiel a subraya.
