“Expo Faces”: un exposicion interesante bunita di fotografia den un concepto nobo na Atelier 89

Elvis Lopez hopi satisfecho cu e presentacion:

ORANJESTAD (AAN)—“Expo Faces” ta un exposicion cu a wordo presenta recientemente, na Atelier 89. Elvis Lopez, director di e Atelier, den entrevista cu DIARIO, a duna di conoce cu ta trata di un exposicion di fotografia, cu ta resultado di un luna largo di trabao di e participantenan.

El a menciona cu e exposicion aki ta uno hopi special, pasobra nan a traha cu otro manera di traha cu potret, cu emocionnan special cu ta hopi sensible pa luz, pa por haci di un potret chikito uno grandi y destaca di biaha e potret riba un obheto. Door di proyecta e potret riba un obheto, nan ta bin cu un solucion nobo, segun Elvis Lopez a splica.

Esaki ta algo hopi special cu por mira den e exposicion aki, den cual 9 artista a participa, hunto cu e maestra, y cada un di nan a demostra nan obranan den nan forma, den nan pensamento, con esaki por resulta y contemporaneo cu nan no pensa prome. Lopez a finaliza reiterando cu esaki ta un exposicion hopi special, realmente bunita y hopi interesante pa mira.