Manera DIARIO corectamente a informa Pueblo di Aruba
*Awe coalicion mester dicidi riba maneho di migracion
*Piñata di problema por rementa awe cu caida di Gobierno
ORANJESTAD(AAN)—Na Augustus 2022 el a celebra e hecho cu el a kibra e record como persona cu a ocupa e puesto di Prome Ministro di Hulanda pa mas tempo.
Dia 5 di Juni 2023 Hulanda a cera e dia cu e pregunta kico lo pasa awe cu Gobierno Mark Rutte, cu den un situacion di crisis severo por cay awe na vispera di su recesion.
DIARIO na forma insistente a mustra Aruba riba e problemanan serio cu ta acumula den mundo politico na Den Haag sigur pa Gobierno di Mark Rutte, cu durante e dianan cu a pasa a percura pa controversia den su relacion cu Aruba, na momento cu e Secretario di Estado Hulandes a mustra cu e ta di acuerdo pa financiamento di e debe di Pandemia di Aruba enfrente Hulanda, wordo mara na supervision pa medio di un Ley di Reino y no un Ley di Aruba.
DIARIO imediatamente a pone Aruba na haltura di e realidad, cu Gobierno Hulandes na e momentonan aki mester evita na tur forma pa tuma un paso cu lo no ta na agrado di e gran mayoria Hulandes.
Ayera un situacion di crisis na Den Haag a confirma e ponencia di DIARIO enfrente intransigencia Hulandes pa loke ta trata exigencia di un supervision di Reino pa Aruba, na momento cu Gobierno di Aruba a logra saca Aruba for di zona di debe y cera e cifranan oficial di Aruba cu un saldo positivo!
Cu Gobierno Mark Rutte number 4, no tin un careda facil, ta wordo confirma dor di e problemanan cu ta topa cu otro na momento cu Parlamento di Hulanda ta prepara pa duna inicio na su vacacion cu ta cuminsa dia 8 di Juli y lo dura te 5 di September.
Ya den mundo politico Hulandes mas y mas tin resistencia contra e vacacion na un momento cu Hulanda mester atende cu problema tras problema.
For di 2022, e pais ta lucha contra e problema cu caida di forsa di compra pa motibo di inflacion a afecta e Pueblo na Hulanda.
Manera DIARIO a presenta na fin di siman pasa, medidanan nobo di Gobierno Hulandes den cuadro di cambio di clima, tambe lo pone peso riba e ciudadano na Hulanda.
Asuntonan ambiental cu ta exigi pues e pakete cu a wordo introduci for di Prome di Juni awor ta topa cu pasonan cu Gobierno Rutte kier tuma riba maneho di migracion.
Ta hustamente migracion y e forma cu kier limita e cantidad di migrantenan cu ta uni nan mes na e populacion Hulandes, ta e problema cu a presenta den seno di Gobierno Rutte y sigur den su partido.
Manera DIARIO cu luho di detaye a splica na diferente ocasion, e resultadonan di eleccion 2023 pa Provinciale Staten na Hulanda, a entrega e prueba di caida di e partidonan cu ta forma Gobierno di Hulanda actualmente y cu lo mester a bay cas si e eleccionnan di 2023 tabata pa Tweede Kamer, cu ta dicidi riba e constelacion di Gobierno Hulandes.
Awe den un situacion di crisis, cu a wordo afirma na Den Haag, lo trata e maneho di migrantenan cu a existencia di Gobierno Rutte number 4, na peligro.
E partido di Rutte, VVD, ta exigi pa prome cu Diabierna, pues awe, un decision cay riba maneho di asilo politico pa refugiadonan.
Dia 6 di Juli 2023 lo bira un dia decisivo pues pa Gobierno Hulandes y continuacion di e actual coalicion di e pais mas grandi di Reino Hulandes.
