Diego de Cuba a wordo retira for di Triple A NV
ORANJESTAD (AAN) –Tocante e tema di su retiro di Triple A, Diego de Cuba a comenta cu dia 21 di Juni ultimo, e tabata ocupando un post y na dado momento un hefe grandi cu ta traha cu FMSA a sali y a pidi De Cuba permiso pa bay tuma un documento for di un persona cu a trece pe. E persona aki, ora el a yega mainta a clear seguridad caba y e tabata paden ta geclear. El a pidi de Cuba pa e por tuma e envelop na porta y el a concede e permiso pa haci esaki na unda cu de Cuba tabata tin full vigilancia riba dje. E persona a tuma e documento y logicamente a sona door di e tunel, y esaki ta un di e motibonan pakico AAA a castiga de Cuba, pasobra el a lague pasa door di e tunel y esaki a sona, y e tabata tin un envelop den su man.
Otro incidente cu tabata tin, conforme e carta di suspension, e pago cu nan a manda p’e tabata pasobra el a laga un otro empleado den mesun situacion pero drenta cu un saco cu fast food. Dia 29 di juni de Cuba a wordo yama pa un combersacion cu el a hiba cu señora Sharin de Cuba, y su señor Lacle, y mi a splica nan kico a pasa precisamente.
“Nan a compronde pero despues, sorpresivamente, mi a haya un yamada, dia 3 di Juli, pa bin cerca nan atardi 6’or, papia cu nan, anto akinan nan a bin cu un carta riba mi, cual tabata e carta di retiro y mi a bisa nan cu no ta husto locual cu nan ta haci. Ora cu mi a lesa e carta di retiro, mi no por a kere. Akinan, nan ta insinuando cu locual mi a haci ta un fout masha grandi mes”, de Cuba a subraya.
El a señala cu na Aeropuerto tin hende ta bende cuminda, y cuminda ta drenta tur dia, sin cu nan ta pasa den machine, ni wordo controla den x-ray. “Esey e sa, mi sa y nos tur sa na aeropuerto. Anto si bo kier kita Diego bo tin cu kita henter aeropuerto. Apart di esaki, ora mi a bira e blachi, mi a wak cu e persona aki, a bay den grabacionnan for di 15 di April, locual ta nifica cu e mester a wak tur caminda unda cu Diego ta traha, kiermen, el a inverti 400 ora pa condena mi. Y locual el a haci eynan no tin pia ni cabes, pasobra locual el a bin cune patras di e carta, nunca mi a wordo castiga p’e. Nunca mi tabata tin un carta di advertencia, ni schorsing, ningun hende a yama mi bisa mi cu locual mi tabata haciendo tabata fout”, Diego de Cuba a remarca.
De Cuba ta indica cu e Manager di Seguridad a causa su retiro, y den otro articulo lo por lesa su declaracion al respecto.
