ORANJESTAD(AAN)—Na un forma intenso, DIARIO ta studia contenido di e rapport riba Refineria di Aruba, den cooperacion estrecho cu expertonan cu na 2018 a permiti DIARIO splica Aruba, cu e pais
mester lubida e proyecto Citgo, cu a stroba Aruba traha na un recuperacion economico cu tabata necesario for di 2012.
Informantenan ta splica cu tin detayenan di e rapport cu Husticia directamente mester atende pa dicidi kico mester haci den caso di diferente persona cu tin relacion directo cu loke a pasa na Refineria di Aruba.
E expertonan cu a atende cu DIARIO na prome luga a mustra riba e posicion importante pero tambe sumamente peligroso cu a wordo crea dor di Gobierno Mike Eman ora ta papia di bon gobernacion cu ta exigi cu pa motibo di control ta evita cu mes persona ta ocupa puestonan importante y asina mester controla y paga su mes.
Na un forma directo expertonan cu ta guia DIARIO a mustra riba e posicionnan cu Richard Arends a ocupa den e desaroyonan di e proyecto Citgo.
Informacion di Richards ta revela cu e tabata parti di e team di Gobierno Mike Eman for di principio y cu e tabata encabesa e staf di Ministro Mike de Meza y uno di e Conseheronan Principal di Mike Eman como Prome Ministro.
Esaki ta nifica cu e decisionnan di tanto Mike de Meza como Mike Eman tabata depende tambe di e consehonan di Richard Arends, cu a wordo nombra como e dirigente di e team negociado di Aruba cu Citgo cu realmente ta Nicolas Maduro.
Expertonan a indica cu for di momento cu gobierno Mike Eman a dicidi cu ta bay atende cu Nicolas Maduro y cu Citgo, cu ya tabata bou investigacion di Gobierno Mericano, gobierno Mike Eman mester tabata sumamente prudente den tur su pasonan.
Gobierno Mike Eman mester a tene consideracion cu e tabata cana riba “cuerda floja” cu Nicolas Maduro y mester a evita cu na Aruba tambe lo a surgi situacionnan cu bon gobernacion ta exigi pa evita.
Richard Arends di consehero di Mike Eman/Mike de Meza, a bira negociado di parti di Aruba cu gobierno di Nicolas Maduro (Citgo).
Despues cu e contracto a wordo firma dia, Gobierno Mike Eman a nombra Richard Arends como Director Financiero di Refineria di Aruba, un compania nobo di Aruba, cu DIARIO ta splica den su edicion di awe.
Pio pa expertonan ta e caracter di misterio tanto den e forma cu e acuerdo cu Citgo a keda secreto hasta pa Parlamento como e hecho cu, segun e relato cu awor Ministerio Publico mester studia, informacion importante manera di reunionnan di Mike de Meza, a bira secrecia.
Por conclui segun e prome datonan cu ta bini dilanti, cu siendo Director Financiero di Refineria di Aruba, Richard Arends no a bandona politica mientras cu pa loke ta trata su compania priva, otro personanan tabata actua tambe como director aparentemente durante su ausencia.
Na mas occasion nomber di Richard Arends ta bini dilanti, pero por mira con e ta participa na eleccion 2017 y ta bira Miembro di Parlamento, como cual e mester controla interes di Pueblo di Aruba den Refineria di Aruba, caminda e no a tuma retiro como Director Financiero.
Pa expertonan importante ta bira awor con funcionnan ta box, loke hustamente bon gobernacion di un pais ta exigi pa evita.
Ministerio Publico mester dicidi si loke a pasa tin un caracter ilegal, cu ta bay contra ley of no ora papia di un suma di 145 Mil Florin cu awe ta wordo discuti.
Richard Arends a bira Minister dia 29 di November 2016. E rapport ta mustra con siendo Minister e siguiente dia cu el a huramenta, e ta aproba pago di 31 Mil Florin pa su mes y di 110 Florin pa e compania Horizon, cu e ta nenga cu ta su compania den su contesta di e investigacion.
Segun Ley mester mira e peso legal di un persona pa no informa Gobernador cu e tabata ocupa un funcion ora el a bira Miembro di Parlamento.
Expertonan cu ta guia DIARIO a mustra cu poco biaha nan a topa cu un rapport manera e documentonan di e investigacion na Refineria di Aruba den cual sigur lo mester presta atencion na e parti di Alvin Koolman cu ta otro capitulo.
