ORANJESTAD (AAN): Riba Dialuna, e noticia tristo a drenta cu un di e Hoteleronan dinamico cu a empuha e spectrum turistico riba e isla a fayece. Ta trata aki di Alex Nieuwmeyer kende te na ultimo
aki tabata Managing Director pa Divi Resorts. El a fayece cu 69 aña di edad.
Alexander Nieuwmeyer a nace dia 31 di Mei 1951 na Amsterdam y pa hopi aña e tabata maneha e propiedadnan di Divi na Aruba. E tabatin ultimo palabra riba tur decision grandi pa haci riba e Hotel, Resortnan, y tambe riba Alhambra Bazar y Casino.
E tabata scucha di e turistanan, y tambe guia su empleadonan pa na un forma corecto y cu perfeccion atende turistanan pa Aruba y e cadena hotelero keda worde reconoci cu e forma cordial y hospitalario ehemplar cu turistanan ta encanta.
Turista contento nifica cu e Resort lo sigui ricibi bishita di huespednan cu ta sigui regresa aña tras aña.
EVENTONAN INTERNACIONAL:
Nieuwmeyer no a djis keda cu e tarea di maneha e cadena hotelero aki riba e isla, sino e tabata duna conseho tambe na tur stakeholders, incluyendo Gobierno pa ora ta trata di inversion- y proyectonan grandi. Esaki ta encera tambe ora di haci presentacion internacional, incluyendo e famoso presentacion di ‘Green Aruba: Where Europe meets the Americas’ na Hulanda. Aki Alex Nieuwmeyer a forma parti di e delegacion hunto cu ex-Premier Hulandes Jan Peter Balkende, y el a mustra e diferente argumento tras di e potencial di Aruba como un elemento esencial di intercambio comercial entre ambos continente.
Riba e area di turismo, Aruba tabata hopi adelanta y logicamente tin di considera casi automatico cu e entusiasmo ta grandi y manera Alex Nieuwmeyer a present’e, e ta un refleho real di e exito cu turismo na Aruba tin. Esey ta importante pa na Hulanda tambe nan por a sinti’e.
Durante e evento ey, e forma con Alex Nieuwmeyer a papia, el a transmiti e confianza na e inversionistanan cu a presenta na e encuentro na Rotterdam, door di mustra con nan empresa, esta e grupo di Divi Hotels & Resorts, a keda crece y con exitoso nan ta durante e añanan.
Danki na e amor grandi pa turismo di Aruba, na December 2020 tambe Gobierno a otorga un reconocemento na Alex Nieumeyer pa su labor desplega na forma sublime pa e isla.
ROTONDE HAYA SU NOMBER:
Riba Dialuna mes, Ministro di Turismo Dangui Oduber a expresa lamento pa cu fayecimento di Alex Nieuwmeyer. El a describi Nieuwmeyer como un cabayero y su contribucion na industria turistico tabata enorme.
Industria turistico na Aruba a perde un gran ser humano den Alex Nieuwmeyer. Segun Ministro, nan a tuma e decision caba cu e rotonde na altura di Alhambra Casino lo carga e nomber ‘Rotonde Alex Nieumeyer’.
Sigur un bunita gesto pa e hotelero aki cu awor a bay sosega. Na colega- y famianan di e fayecido, DIARIO ta extende su mas profundo palabra di condolencia.
