Masterclass di Fundacion Pro Lechi Mama
ORANJESTAD (AAN): Manera stipula riba un pagina anterior awe di DIARIO, ta asina cu e Fundacion Pro Lechi Mama ta preparando pa un Masterclass titula “Empower Your Breastfeeding Journey”, cu ta dedica na parehanan cu lo ta hayando baby pronto.
Un di esnan cu ta bay duna presentacion riba Diasabra mainta di 8:00 am te cu 12:00 pm na edificio di ATIA na Pedro Gallegostraat, ta Laura Tromp. E ta un ‘Pregnancy & Parent Coach’.
Su trabao ta pa prepara mamanan cu ta en espera di un yiu, y durante e 9 lunanan ey ta preparando nan pa tur loke nan ta bay topa cune, esta e ‘emotional rollercoaster’.
E ta prepara nan tambe pa nan parto. El a realiza cu tin hopi hende muher cu tin dificultad pa acepta cu esey ta un experiencia cu pa 1 of mas biaha so ta bay pasa aden, y aki ta unda cu Laura ta duna nan y ofrece sosten emocional.
E ta guia nan tambe despues di a duna luz, y den e prome siman cu nan a haya nan baby. Laura a mustra cu e ta guia mayornan tambe cu tin muchanan chikito, y esnan cu tin yiu te cu 10 aña.
Topico di Matrescence, e cambionan di Muher pa Mama: Laura Tromp mes ta bibando y ta haci e trabao na Hulanda. Ora cu e tabata cu vakantie na Aruba, el a conoce Fundacion Pro Lechi Mama. Aki e conexion a cuminza, y e tambe tabata kier a duna algo back na comunidad, den forma di charla y asina trece mas concientizacion riba loke e ta haci, y enfoca riba e topico emocional ora cu un ser femenino bira mama.
Pa casualidad e dia cu e kier a haci Masterclass, ta e mesun fecha cu Fundacion Pro Lechi Mama ta cumpli 20 aña di existencia.
E topico “Matrescence” cu e lo papia di dje ta uno poco conoci, pero no poco importante. E ta topico sumamente importante, no djis pa e mama sino pa e tatanan y tur persona di apoyo cu tin rond di un mama nobo, of esnan cu ta hayando nan di tantisimo yiu.
E ta importante pa profesionalnan medico cu ta trata cu mamanan en espera of cu mamanan cu tambe tin yiu caba.
Matrescence ta un palabra nobo pa hopi hende, y e ta comparable cu loke ta cambionan den adolescencia. Y e cambio di muher cu ta bira mama, ta wordo yama ‘Matrescence’, y ta papia di e cambio emocional, sicologico, y fisico cu un hende muher ta enfrenta y haya su mes aden ora e bira mama.
Esnan cu kier acudi na e Masterclass, tin di registra na:
