Mientras lidernan mundial ta busca solucion pa sobrevivencia di mundo --- *Di cuna respeta un Arubiano ta duna guia na empresanan Arubano clave -- *Un Arubiano capacita ta dirigi e necesidadnan basico di su Pueblo
ORANJESTAD (AAN) — Na 1990 Gobierno di Aruba a introduci Utilities Aruba N.V., e compania bou cual Elmar N.V. y WEB N.V. a resorta.
Utilities Aruba N.V. a mira luz na momento cu mundo tabata traha riba un rumbo nobo pa dos aspecto basico den comunidad, cu ta awa y electricidad cu durante Siglo 20 a conoce un evoluacion sumamente importante.
Bienestar di un comunidad ta depende directamente di e calidad di awa, cu ta un garantia pa salud di hende como un ingrediente basico pa bida humano pero tambe pa e higiena cu hende mester y e produccion di cuminda propio na un pais cu poco yobida.
Electricidad mester haci produccion posibel pa comunidad moderno, cu mester busca solucion pa factornan cu den produccion di coriente, por causa problema serio pa bida di hende.
Na e momento aki, manera den otro articulo DIARIO ta trece dilanti, lidernan mundial ta debati riba e maneho cu mester wordo hiba den produccion di energia, cu ta e forsa pa produccion di un comunidad.
Utilities Aruba N.V. ta ocupa un lugar central pues den e realidad democratico di un pais, pasobra ta a base di e grado di bienestar cu e pais conoce, por papia di garantianan democratico.
Ta cu hopi placer, DIARIO a tuma nota cu Gobierno Evelyn Wever-Croes a dicidi cu e ta nombra e experto Arubano, Anthony Rojer, MBA, como dirigente di Utilities Aruba N.V.
Como matutino di Aruba, DIARIO a huzga e nombramento di Anthony Rojer den e posicion clave pa Aruba no solamente na e hecho cu e ta un persona capaz, pero DIARIO a base di e moral Arubano, a explora e grado di integridad cu por spera di Anthony Rojer.
E dirigente nobo di Utilities Aruba N.V., cu ta ocupa un puesto den cual integridad ta clave debi na decisionnan cu lo mester wordo tuma, ta bini di un famia Arubano respeta.
Naci di mayornan trahador, reconoci na Aruba pa nan integridad y honestidad, nos por tin tur confiansa cu Aruba a pone destino di su utilidadnan den man di un gerente cu conoce e necesidadnan di Aruba como hende di Pueblo cu moral di Pueblo Arubano.
Tempo a duna prueba di e necesidad di e union entre capacidad y integridad cerca dirigentenan di Pueblo, un grupo na cual for di Prome di November 2021, Anthony Rojer ta pertenece.
Su capacidad ta presente den su cualificacion profesional como experto riba tereno financiero y economico, cu awe Aruba mester.
E situacion cu un serie di crisis durante Siglo 21 a crea y cu a culmina cu entrada di Covid-19, ta haci cu den exploracion y decision di loke ta bon pa Aruba, mester di integridad y capacidad pa por dicidi riba e bon maneho di entrada y gastonan di companianan di utilidad di Aruba.
E pais no por cay den fantasia. E pais di otro banda mester cumpli cu Pueblo, cu manera sin duda ta conoci cerca e Arubiano Anthony Rojer, mester di dirigentenan cu curazon pa henter Pueblo na tur nivel social.
E dirigente nobo di Utilities Aruba N.V. ta conoci cu necesidadnan di e sector comercial, e sector di trahador, e sector tambe di hende sin entrada.
No solamente ya e Director nobo di Utilities Aruba N.V. ya tabata parti di e Conseho di Supervision di e compania di estado, pero como hende el a crece y wordo educa den un cas Arubano, caminda compasion y sentido civico ta central.
Na un momento crucial, Anthony Rojer, portador di e Titulo di Master Business Administration, ta asumi responsabilidad pa Utilities Aruba N.V.
Un responsabilidad grandi ta spera su persona pa yuda garantisa bienestar basico di e Arubiano na entrada di un futuro mundial nobo!
