Menasa cambio di clima den crisis di petroleo y atake frontal di Covid-19 --- *Na 2025 mitar di poblacion mundial lo confronta scarcedad di awa --- *Dos grado mas calor ta sentencia di morto pa cierto islanan Caribense
ORANJESTAD (AAN) — Na e momentonan aki na Glasgow, Inglatera, dirigentenan mundial ta papia di accion urgente pa scapa mundo di resultadonan di e forma cu hende a maltrata Planeta Tera mientras na La Palma, un volcan ta splica hende cu naturaleza ta sigui su curso, ta sigui cambia y causa desaroyonan nobo pa e planeta.
Na Aruba, e nivel di bida y loke hende por paga pa uza mas air conditioning pa baha calor, sistemanan sofestica pa produci awa limpi y coriente, poco ta puntra nan mes cuanto tempo mas por sigui sin wordo presenta cu catastrofe.
Importante ta pa tuma nota di e representante di e pais Africano Kenya, kende a trece dilanti con na e momentonan aki 2 Miyon persona ta muri di hamber pa motibo di e cambio di clima.
El a splica tambe cu si nada cambia, na 2025 mitar di poblacion di mundo lo mester biba cu scarcedad di awa.
Realidad a yega mas cerca di Aruba, cu palabranan di dirigentenan di paisnan den Caribe, manera di Barbados, cu a mustra cu si bira dos grado mas calor, esaki lo bira fin di algun pais den Caribe y otro partinan di mundo.
Paisnan ta compromete nan mes pa yuda baha e riesgo. Prome Ministro di Inglatera a splica cu ta casi 12 or.
E pregunta ta keda awor kico mester haci na un mundo, cu pa por genera coriente, cu ta e combustibel di futuro, te awor mester di carbon, petroleo of gas.
Companianan di petroleo y productor di gas, sigur na paisnan manera Merca y Europa, ta trata na baha e peligernan di e productonan aki dor di bini cu refinerianan mas limpi y baha e nivel di gasnan venenoso den petroleo y gas.
Pero kico esaki lo haci cu economia?
Companianan manera Quanten cu kier habri un refineria na Aruba, ta papia di un epoca nobo den cual lo deshaci di e refineria bieu di Lago y construi un planta a base di energia mas limpi.
Pa paisnan productornan di petroleo, cambio di clima ta nifica problema pa e negoshi di petroleo. Esaki a haci cu nan a subi nan prijs y a duna prueba na mundo kico lo pasa si no tin petroleo na un mundo cu ainda no tin alternativa real pa petroleo.
Mientras diferente metodonan ta wordo aplica pa haya energia for di solo, movecion di awa y biento entre otro, uno di e metodonan cu mas y mas ta haya atencion ta energia nuclear.
Energia nuclear a hiba hopi hende na e momento cu e bomnan atomico a rementa na Hapon pa pone un fin na Segundo Guera Mundial y mundo a cuminsa biba den un temporada di susto grandi pa loke forsa nuclear por nifica pa hende.
Sinembargo, mas y mas a sigui traha riba energia nuclear cu na 1986 a bolbe haya tur atencion ora na Chernobyl un planta nuclear a conoce un explosion y miedo a surgi kico e resultadonan lo tabata.
Na 2011 un planta nuclear na Hapon a registra un explosion.
Pa defende e uzo di energia nuclear, ta wordo trata di splica e cantidad di morto cu cada tipo di produccion di energia ta trece.
Den rapportnan oficial cu ta atende e necesidad pa baha uzo di entre otro petroleo, ta wordo mustra riba e cantidad di morto cu produccion di productonan petrolero y nan uzo ta produci.
Den e caso aki ta mustra cu uno di cada cinco caso di cancer, lo ta relata na e hecho cu ainda productonan fosil ta base pa produccion di energia.
Cu e punto aki ta trata di bay contra e opositornan di energia nuclear, cu ta mustra riba e problema serio cu un planta nuclear por wordo uza pa otro propositonan pero tambe riba e victimanan cu e por crea.
Energia limpi ta e palabra cu ta tene e conferencia na Glasgow, Inglatera, preocupa. Na mes momento energia ta e problema serio cu ta presenta den produccion mundial caminda productornan di petroleo ta uza e necesidad di petroleo y gas como combustibel principal.
E pregunta clave ta keda, si energia nuclear cu como arma den guera por pone fin na mundo den un rato, lo mester bira salbador di mundo mientras mas y mas pais ta participa na e careda pa introduci energia nuclear.
Na Glasgow sin duda, rumbo di un mundo cu ta parce di a perde rumbo, ta wordo discuti!
