Exitoso tabata e prome evento organisa pa Comerciantenan Uni Aruba

ORANJESTAD (AAN):  Un grupo grandi di comerciantenan a asisti recientemente na e prome Businesss Networking Event organisa pa Comerciantenan Uni Aruba (CUA).

E encuentro a tuma luga na e espacio paden y pafo di Harbour House den centro di Playa den oranan di atardi pa anochi.

            Esnan presente a expresa di a keda masha satisfecho cu loke a wak y scucha; tanto for di e directiva di CUA, como tambe di e orador invita. Fuera di sinti cu e gremio lo tin un bon representacion di nan interesnan, tambe por a conoce detayenan interesante di e proyecto Gateway 2030 di AAA N.V. y papia cu otro comerciantenan.

            A hiba palabra Sr. Francis Saladin Jr. kende hunto cu e actual presidente Sr. Frans Ponson ademas di Sr. Randall Croes, ta forma e directiva actual. Mientras cu Saladin a papia di e motibonan pakico CUA  a nace, Ponson a elabora riba e aplicacion mobil cu tur presente por a download na e momento ey y con e organisacion ta bay haci uzo di dje pa mantene un contacto y comunicacion estrecho cu nan miembronan.

            Un di e propositonan di e app ta pa dialoga riba topiconan di interes actual y yena na posicion di CUA den diferente aspecto di un manera democratico y sin ‘red tape’.  Di su parti, Sr. Randall Croes a trece dilanti algun di e temanan importante y pendiente pa trata manera Landspakket, reforma fiscal y leynan laboral, entre otro.

            Como prome orador na un evento di CUA, a invita Sr. Shensley Tromp, kende ta gerente di desaroyo y IT pa aeropuerto na Aruba Airport Authority N.V. El a duna un presentacion concentra di loke ta e prome fase di e proyecto Gateway 2030 y kico por bay spera ta e cambionan positivo den e experiencia pa e usuarionan.

            Otro punto resaltante di su presentacion y di e anochi riba su mes ta e anuncio cu AAA N.V. hunto cu otro aeropuertonan di Caribe Hulandes a cera un aliansa y ta trahando riba un proyecto di aviacion electrico cu lo por revoluciona e trafico aereo regional cu pasashi entre islanan ABC y St. Maarten pa prijsnan sumamente economico. Esaki na su luga, por fomenta hopi e relacionnan comercial entre e diferente islanan.

            Sigur un anochi masha agradabel caminda representantenan di companianan chikito, mediano y grandi por a disfruta di un ocasion agradabel despues di hopi tempo y acontecimentonan tras di lomba, pero tambe pa pensa hunto riba e posibilidadnan cu futuro ta trece dilanti.