Exitoso show di moda di Osyth Resort Wear y Maison Ryon Aruba

ORANJESTAD (AAN): Den fin di siman cu a pasa, Osyth Resort Wear a presenta

“The Depth of Light – An Art & Fashion Soiree” na Aruba Ocean Villas, un anochi exclusivo caminda moda, arte, gastronomia y musica a bin hunto den un ambiente intimo y elegante.

   Centro di e anochi  tabata Osyth Resort Wear y su coleccion di kaftan pinta na man, caracteriza pa colornan bibo, diseño unico y un estilo cu ta combina elegancia cu bida tropical. E kaftan tin un historia rico cu ta bay bek hopi siglo. A traves di tempo, e prenda aki a biaha door di diferente cultura, palacionan real y rutanan di comercio, for di Norte Africa y Medio Oriente te na Europa, y eventualmente a haya su lugar den moda moderno.

   E historia aki ta conecta naturalmente cu e vision di Osyth Resort Wear. Pa Osyth, e kaftan ta mucho mas cu solamente un prenda pa beach. E ta representa libertad, elegancia, biahe y expresion artistico.

E versatilidad di e kaftan tambe ta un parti importante di su encanto. Durante dia, e por wordo bisti riba un traje di baño, y despues combina cu joyas y sandalia elegante pa disfruta di un cocktail of un cena. Cu su kaftannan pinta na man, Osyth ta duna cada pieza su propio identidad, convirtiendo e prenda den un obra di arte cu bo por bisti.

   Durante The Depth of Light, e creaccionnan di Osyth a cobra bida den e ambiente unico di Aruba Ocean Villas. E combinacion di color, movimiento, luz, awa y e belleza natural di e localidad a forma parti di e experiencia completo cu Osyth a crea pa e invitadonan.

   Como partner den e evento ta diseñador y marca local, Maison Ryon Aruba cu a presenta su Legacy Line, un coleccion cu ta bolbe na e prints cu tabata na e base di Maison Ryon, dunando nan un bida nobo den un ambiente diferente cu ta refleha e esencia di e inspiracion isleño di Maison Ryon.

   E capsule collection aki cu ta un “extra” pa e aña aki como cu Osyth a acerca Maison Ryon pa ta partner den evento aki, el a lansa oficialmente e diseño di Cinco Porta cu a  trece hunto dos mundo cu tin un conexion special cu comercio y cultura: Istanbul y Nieuwstraat Oranjestad, unda e cas di Adriaan Lacle tabata fungi cu su Cinco Portanan como un cas di Intercambio. Un inicio di un capitulo nobo pa Maison Ryon, introduciendo cuero pa prome biaha den su coleccion, entre otro den mananan pa tas cu detalle di oro, crea pa combina cu scarfnan cu ta un icono di e marca.

   E experiencia di e anochi a wordo complementa cu un cena special y nan ta gradici tur patrocinador.  Cu The Depth of Light, Osyth Resort Wear a presenta mucho mas cu moda. E evento a conta e historia di un prenda cu a biaha pa generacionnan y culturanan diferente, y cu awe ta sigui evoluciona den un expresion di arte, elegancia y libertad.