ORANJESTAD (AAN): E concepto ta simple: Organiza un Festival di Karaoke pa asina dicidi cu exactitud, kendenan ta e berdadero campeonnan di cantamento cu e sistema di Karaoke.
Recientemente e Festival di Karaoke a wordo organisa na residencia di Tony Geerman na Ayo. Un Cuerpo di Hurado tabata presente, hunto cu monton di persona cu a bin apoya na cantantenan faborito di Karaoke. E lugar tabata full-house.
Un total di 26 cantante a subi escenario pa asina demostra cu nan voz fenomenal, con bon dominio nan tin riba esaki hunto cu e tonada corecto pa acompaña e cancion.
Na final di anochi, e mihor cinco cantantenan di Karaoke a bira conoci, y publico a aplaudi y acepta e decision di huradonan.
Ganador maximo di Karaoke Festival a bira Johnny Gerritsma. El a ricibi un bunita trofeo y regalo di e organisadornan.
Prome finalista a bira Alexander Marmol kende tambe a haya trofeo y regalo. Di dos finalista a bira Ilaisa Jansen, y el a ricibi su trofeo y regalo.
Di tres finalista a bira Isabela Croes cu a haya su trofeo y regalo. Di cuatro finalista a bira Jaime Robles de Medina cu a ricibi trofeo y regalo.
Esaki tabata e ultimo concurso di Karaoke pa 2023, y corectamente a honra e mihor cantantenan di Karaoke cu a sobresali den 2023.
Pabien na e mihor cantantenan, y tambe felicitacion na organisadornan pa un evento bon organisa.
https://diario.aw/categories/noticia/general/exitoso-festival-di-karaoke-a-premia-e-mihor-cantantenan-di-2023#sigProId8deb0e14a9
