ORANJESTAD (AAN): Participantenan procedente di organizacionnan di tur seis isla di parti Caribense di Reino y di ministerio di Asuntonan Interno y Relacion di Reino (BZK)
a papia cu otro tocante promocion di experticio durante e prome ‘Integrity Summit Dutch Caribbean’ na Curaçao di 30 di october te cu 3 di november.
A palabra cu ta bin un plataforma pa intercambio di ‘best practices’ y experiencianan diario cu e meta pa eleva e nivel di experticio y promove cooperacion riba tereno di integridad den Reino.
Alrededor di 30 participante di 15 diferente organizacion gubernamental a acorda pa lanta un plataforma den cua tanto e paisnan autonomo como Hulanda Caribense ta participa y den cua periodicamente ta intercambia conocemento y experiencia tocante promocion di integridad den gobierno, entidadnan afilia na gobierno y comunidad en general.
E enfasis al respecto ta riba promocion di experticio di organizacionnan local cu ta atende cu esaki. Ta bin tambe un vision pa futuro pa sigui traha conhuntamente riba integridad na pia di trabao den organizacionnan gubernamental den parti Caribense di Reino.
Tabatin entre otro oradornan tambe presente di ‘Huis voor Klokkenluiders’, Cruz Cora, ‘Bureau Integriteit Amsterdam’, ‘Nyenrode Business Universiteit’, ‘Dienst Justitiële Inrichtingen’ y directorado ‘Ambtenaar en Organizatie’ di ministerio di BZK. Ex-gezaghebber y miembro di Colegio supervision financiero (Cft), Glenn Thodé, a habri e cumbre cu un discurso tocante integridad den e parti Caribense di Reino.
Comparti experencia: “No por subraya suficientemente importancia di e ‘Integrity Summit’. Porfin tin un encuentro di e cuater paisnan den Reino, cu integridad sentral riba agenda. Habitantenan di e islanan den e parti Caribense di Reino ta anhela pa tin mandatario-, funcionario- y amtenarnan integro.
Pa esnan cu ta traha riba promocion di integridad ta di sumo importancia pa tin un infrastructura pa comparti conosemento y experencia cu otro y pa duna otro sosten y coopera cu otro. E union di forsa pa medio di e prome ‘Integrity Summit’ ta duna mi e speranza riba un futuro cu mas integridad den comunidad,” segun Thodé.
Promocion di experticio: Meta principal di e conferencia tabata pa sera conoci cu otro y promove experticio di colaboradornan di e oficinanan di integridad di Aruba, Sint Maarten, Entidad Publico Bonaire y Rijksdienst Caribisch Nederland, funcionarionan di integridat, investigadornan, personanan di confianza y di e Entidadnan Publico Saba y Sint Eustatius, Warda Costa Caribense, Corte Comun di Husticia Caribense, Ministerio Publico Caribense, Cuerpo Policial Hulanda Caribense (KPCN), Instituto Hudicial Hulanda Caribense (JICN), Representante di Reino, Koninklijke Marechaussee (KMar), Ministerio di Maneho di Gobernacion, Planificacion y Servicio Publico y Ministerio di Husticia di Curaçao.
Promocion di experticio ta esencial, pasobra ta importante pa e parti Caribense di Reino traha riba e tarea pa pone integridad na nivel of mantene integridad den organizacionnan gubernamental. Ta bay den esaki particularmente pa e grado cu e organizacionnan ta capas pa combati iregularidad (financiero) (manera fraude y corupcion) y formanan di anda indesea (manera abuso di poder, insulto, discriminacion, intimidacion y exclucion), tanto preventivo como reactivo.
Organizacion: E idea pa e ‘Integrity Summit Dutch Caribbean’ a nace for di un necesidad di e colaboradornan di integridad di e parti Caribense di Reino mes. Ministerio di BZK y SRA-Caribbean & Partners NV, un oficina local cu ta specialisa den entrenamento y conseho riba tereno di integridad y cumplimento, a organiza e cumbre.
E cumbre cu a tuma luga pa prome biaha, ta sirbi como un trampolin pa un forma di cooperacion mas structural. E organizadornan ta papia di un siman exitoso cu a keda ricibi cu hopi entusiasmo.
