Exitoso congreso y consulta pa festeha e di 35 aña di Conseho SER na Aruba

ORANJESTAD (AAN): Social Economische Raad di Aruba (SER) a wordo estableci via un ordenanza nacional dia 24 di September 1987 como un Colegio di Conseho independiente y pesey awor e ta existi ya caba pa 35 aña.

   E celebracion di 35 aña a wordo festeha extensamente siman pasa cu un programa di 2 dia riba Diaranson 19 y Diahuebs 20 di October.

   E prome dia a wordo dedica na un congreso den Aula di Universidad di Aruba cu e tema “E dinamica di dialogo social tripartite den e Consehonan Economico Social”.

   E congreso a conta cu presencia di varios distinguido invitado, manera Gobernador Interino Augustin Vrolijk, Vice-President di Staten Raymond Kamperveen, Prome Ministro Evelyn Wever-Croes, Ministro Geoffrey Wever, lidernan di fraccion y representantenan di Raad van Advies, Contraloria General, y VNO, varios director di departamento di Gobierno, como tambe Rector y decano y studiante di Universidad.

   SER a keda hopi complaci cu presencia di huespednan di exterior, e.o. di organizacionnan ruman manera Secretario General di SER-Nederland, e Secretario General di SER-Curaçao, presidente y Secretario General di SER-St. Maarten, y Director di BrabantAdvies.

   Despues di e discurso di bon bini di president y e discursonan di Prome Ministro y Ministro Geoffrey Wever, a duna presentacionnan substantivo riba e tema central di e congreso, duna pa representante di diferente SER den Reino Hulandes.

   E Secretario General di SER-Nederland, esta Jacqueline Prins a papia riba e origen, metodo di trabao, y desaroyo di SER-Nederland den e modelo di polder hulandes y economia consultivo.  E Secretario General di SER-Curaçao, Raul Henriquez a papia riba e rol cu dialogo social, den forma institucionaliza, ta hunga den logro di metanan di desaroyo sostenible di Nacionnan Uni y con SER-Curaçao ta interpreta esey.

   E Presidente di SER-St. Maarten, esta Damian Richardson a duna un presentacion riba e historia y e desaroyo di dialogo social eynan, como tambe e retonan cu e organo di conseho ta confronta na comienzo di su existencia.

   Como orador principal, e directora di BrabantAdvies, esta Ivka Orbon, a papia riba e metodo di trabao, e ventahanan, y e retonan di e structura unico di dialogo social pa y entre e 4 consehonan di SER bao 1 dak.

   E Diahuebs a wordo domina di un consulta secretarial (oficial) entre e representantenan di diferente Conseho di SER presente di Reino Hulandes, como tambe BrabantAdvies.  Aki a traha acuerdonan pa profundiza aun mas e relacion di cooperacion, a discuti temanan socioeconomico actual y a intercambia di conocemento y experiencia riba e mihor practicanan y enfoque relaciona cu nan trabao.

   Riba e potretnan por mira djis un tiki di e aspectonan mas destaca di e congreso.