Exitoso concierto di ‘Nos Deseo’ di Scol di Musica Rufo Wever

Presenta pa Addonsito Croes

ORANJESTAD (AAN): Den un sala di Cas di Cultura completo bendi a tuma lugar e concierto di Pasco di e alumno- y maestronan di “Scol di Musica Rufo Wever” (SDMRW) pa 2023.

   E conocido Addonsito Croes a presenta concierto “Nos Deseo” aki.  “Un orguyo grandi e tabata pa mi ta parti di e concierto unico y di nivel halto aki. E aña aki e scol di talento musical aki a cumpli 70 aña di existencia y un biaha mas e alumnonan a sa di brinda nan publico un concierto tremendo,” el a declara.

   Maestronan Hester Mathijssen, Derrick Lopez, Daniel Werleman, Rob Rijnbout, Franklin Granadillo, Jaderick Croes, Carlos Bisslip, Richard Holmond, Kyle Winklaar, Catherine Provence, Gina Werleman por ta orguyoso di loke nan alumnonan a brinda e publico.

   Cancionnan manera Jingle Bells, All I want for Christmas is you y Paranda Arubiano tabata algun cantica presenta.

   Tabata un placer y honor pa mira y scucha e coro na final consistiendo di Lila Richardson, Xiomara Jacobs y Gina Werleman compañando e cantante Andy Farro den e cancion Paranda Arubiano.

Danki y un biaha mas pabien cada maestro y alumno di SDMRW y hopi exito den 2024.