Exitoso carousel di profesion pa alumnonan di John Wesley College

ORANJESTAD (AAN): John Wesley College (JWC) a tuma un bunita iniciativa di organiza un carousel di profesion pa su alumnonan.

   A invita seis profesional cu trabaonan varia, manera parlamentario, event planner, artista (pintor), hues, traductor y topografo midido di tereno (landmeter). E meta di e carousel ta pa prepara alumnonan di JWC pa e College Fair unda nan lo por usa e informacion adkeri den e carousel pa tin un mihor idea di cua booths na e College Fair ta cay na nan agarado.

   Otro meta di e carousel ta pa facilita nan escohencia di profiel, unabes bo tin un idea di ki tipo di profesion ta fit mas bon cu bo persona, e ta bira mas fasil pa escohe un profiel.

   Studiantenan a keda asombra cu e informacion cu e carousel a brinda y a pidi John Wesley College pa por fabor ripiti e evento fantastico.

   Basa riba e dia exitoso, John Wesley College ta preparando pa organiza un di dos carousel. Si abo kier conta di bo profesion, por fabor tuma contacto cu nan via email: This email address is being protected from spambots. You need JavaScript enabled to view it..

   John Wesley College kier gradici di curason e oradornan Dave Bruyning, Natalie Silvania, Marco Berlis, Armando Goedgedrag, Sharon Figaroa y Clinton Foy cu nan a tuma nan tempo pa combersa cu e alumnonan tocante nan profesion.