Exitoso anochi Informativo pa sa con pa domina infeccion na scol y centro pa cuido di mucha

ORANJESTAD (AAN): Siman pasa Diahuebs, un grupo di trahador pedagogico di diferente centro di cuido y guia di mucha

a participa den un anochi informativo tocante dominio di infeccion na scol y na centro pa cuido di mucha.

  E anochi aki a worde organiza pa Fundacion Pa Nos Muchanan (FPNM) conhuntamente cu Directie Volksgezondheid (DVG) y Jeugdgezondheidszorg (JGZ).

   E informacion tocante dominio di infeccion a worde duna pa Dr. Cesar Palma y Dr. Luis Cortes. Nan a duna un splicacion di diferente infeccion cu un trahador pedagogico por encontra na un centro di cuido di mucha. Entre otro; diferente infeccion di cuero, infeccion respiratorio, infeccion cu diarrhea y/of sacamento, y otro tipo di infeccion.

   Algun ehempel di infeccion cu a worde trata ta bruella, krentenbaard, griep, covid, y hasta pieu.

   Pa cada infeccion Dr. Palma y Dr. Luis a duna conseho y informacion tocante e pasonan cu un centro mester tuma pa yuda e mucha y na e mes un momento proteha e otro muchanan y nan mes.

   E tabata un anochi informativo y exitoso caminda FPNM kier gradici Dr. Palma y Dr. Cortes pa nan tremendo presentacion y tambe kier gradici cada trahador pedagogico pa nan presencia.