Exitoso anochi di ‘Un Canto na Bernadina Growell-Kock’

ORANJESTAD (AAN): Na Centro di Bario Brazil, a tuma lugar den fin di siman e evento di ‘Un Canto na Bernadina Growell-Kock’,

organiza pa Fundacion Bernadina Growell y tabata un euforia di musica tipico di Aruba cu a resona.  Hasta un grupo tipico di Colegio Arubano, a presenta riba escenario, unda Ryah Sy a presenta un cancion di Bernadina Growell, y tambe e hoben Maria Petrocchi.

   E anochi aki a demostra cu berdad, Bernardina Growell-Kock merece e nomber di cariño ‘Mama di Cultura’ exclusivamente p’e.

   A tuma nota presencia tambe di Ministro Mervin Wyatt-Ras, kende a goza di e anochi, y a haya chens di combersa cu hopi persona cu tambe tin cultura di Aruba poni como prioridad.

   E anochi aki nan a duna reconocemento tambe na Roberto Orman, mihor conoci como ‘Boeis’, kende na comienzo di luna di Juli a fayece.  Famianan a ricibi e honor aki cu sentimentonan mixto, pero satisfecho cu nan ser keri lo keda den memoria di hopi hende sabiendo con hopi el a nifica pa cultura di Aruba.

   Ministro Mervin Wyatt-Ras a felicita Fundacion Bernadina Growell pa nan 15 aña di trabao pa keda eleva cultura di Aruba.