Exitoso ‘Anochi di Profesion’ pa studiantenan di Colegio Arubano

ORANJESTAD (AAN): Recientemente e organizacion WeConnect den colaboracion cu decanaat di Colegio Arubano,

a organiza e ‘Anochi di Profesion’ anual pa e alumnonan di HAVO 4 y 5, tambe VWO 4, 5, y 6.

   Organizando e Anochi di Profesion aki, tanto Colegio Arubano y WeConnect ta ofrece un plataforma unda e alumnonan por drenta den contact directo cu profesional- y expertonan di diferente sector.  Ademas, e ta yuda nan descubri ki paso nan por tuma pa yega nan metanan profesional.  E anochi aki ta forma parti di un serie mas amplio di sesionnan informativo di WeConnect, cu ta wordo ofreci tanto na Aruba como tambe demas islanan.

   Mas di 300 alumno a bishita e Anochi di Profesion y a combersa cu e profesionalnan cu a papia riba nan profesion y estudionan haci.  En total 40 profesional di diferente sector di trabao a wordo invita pa bay papia riba nan trabao.  Entre otro, tabatin un ciruhano, un miembro di Wardacosta, un abogado, y un cineasta kendenan tur a papia loke nan trabao ta encera den practica.

   “Nos a observa cu e studiantenan na Aruba ta resulta bastante dificil eligi un carera pa studia na Hulanda.  Un profesional entusiasma cu ta papia riba su profesion por informa y inspira un hende,” ta loke Rachel Hughes a splica, kende ta coordinador di WeConnect na Aruba.

   E meta ta pa sostene e alumnonan den nan escogencia pa un estudio, y mas despues, e carera profesional.  Pa e Anochi di Profesion, a logra haya profesionalnan di diferente sector cu tabata dispuesto pa informa e alumnonan.  Omar-Steve Lejuez, empresario, a conta cu el a disfruta di e anochi y cu hopi placer el a splica e alumnonan loke su profesion ta consisti y con el a yega te eynan.  E boticario Kaylen Guda a considera e anochi como uno cu gran interes: “Hobennan no tur biaha ta tende loke e profesion di boticario ta encera, pues mi a haya chens pa papia algo completo di esey.  Ami mes tambe den pasado a yega di conoce e carera aki danki na Anochi di Profesion asina.

   Un alumno a declara: “Ainda mi no sa bon exactamente loke mi kier studia, pues un anochi manera esaki a yudami compronde mihor tur e posibilidadnan cu ta existi.  Ademas hopi di esnan cu a papia ta ex-alumno di Colegio Arubano, pues mi a mira cu nan a pasa den e mesun ‘stress’ cu mi.”

   E alumnonan via un QR code por a participa den un encuesta unda nan por a indica na e organizacion, cua di e profesionnan nan a haya mas interesante, y con nan experiencia tabata durante e Anochi di Profesion.  Di eynan, e organizacion por conclui cu e Anochi di Profesional tabata un anochi exitoso y fructifero pa e alumnonan.

   Fundacion WeConnect ta compromete su mes pa mehora e preparacion pa e carera profesional y escogencia di profesion, cuminzando den klasnan mes.  Cada biaha mas scol ta mira e necesidad y e efecto di orientacion profesional pa nan alumnonan, ta loke Anja van Bergen a bisa, kende ta coordinadora di tur actividad di WeConnect relaciona cu yudansa pa profesion.

   Bao direccion di e directora nobo Pam Evertsz, WeConnect a destina un presupuesto adicional pa otro aña pa yuda alumnonan den Caribe Hulandes.  “Mi ta orguyoso di nos team, cu a sostene e expansion aki asina facilmente y ta ehecutando esaki.  E visualizacion di bo futuro y hermentnan practico pa tuma e prome pasonan, esey ta unda tur cos ta start.  E chensnan aki mester ta accesibel pa tur mucha di Caribe Hulandes, for di educacion secundario basico te na educacion secundario mas halto, independientemente si acaso nan por sigui nan estudio riba e isla mes of na otro lugarnan, segun Pam a indica.

   E potretnan aki di e Anochi di Profesion ta pa cortesia di WeConnect.