Un decision di Huez a describi importancia di trabou di Frederick --- *Algemene Rekenkamer Aruba decisivo pa trabou di Parlamento --- *Presidente ARA ta apunta e Presidente Suplente di Conseho Electoral
ORANJESTAD (AAN) — Pa Pueblo, democracia na Aruba sigur ta wordo representa dor eleccion general secreto.
E personanan cu ta forma parti di e Conseho Electoral, cu ta decisivo pa buena marcha democratico di Aruba, pa Pueblo ta sumamente importante.
Awe Pueblo di Aruba ta wordo confronta cu un scandal cu a surgi, rond di e persona cu tabata ocupa e Puesto di Presidente Interino di Algemene Rekenkamer Aruba, cu ta Frederick Nuboer.
Algemene Rekenkamer Aruba, pa un gran parti di Pueblo ta un instancia menos conoci pa loke ta trata su trabou y su importancia den ehecucion di democracia na Aruba.
Sinembargo, Parlamento di Aruba mester di Algemene Rekenkamer Aruba pa haci su trabou diario.
Den su informacion na Aruba, DIARIO semper a enfatisa e papel importante di Organonan Halto di Estado, cu hopi bez no ta ocupa posicionnan cu ta goza di e atencion cu nan mester haya cerca Pueblo, cu den demasiado caso ta mira como “gobernacion” solamente loke ta mara na e proceso politico electoral.
Na momento cu Frederick Nuboer como persona a comporta su mes na un forma inaceptabel, e mester a tuma su retiro como Presidente di Algemene Rekenkamer Aruba.
E posicion cu e tabata ocupa ta directamente mara na e bon trabou di Parlamento di Aruba y hasta e sistema electoral cu ta conduci na e nombramento di Miembronan di Parlamento.
Den e proceso electoral mester di un Presidente di e Conseho Electoral, cu ta e persona cu ta dicidi riba ehecucion di eleccion.
Segun Ley, e Presidente Suplente di Conseho Electoral ta wordo apunta dor di e Presidente di Algemene Rekenkamer Aruba.
Pa enfatisa e peso di e puesto di Presidente di Algemene Rekenkamer Aruba, mester mustra cu e persona cu ta apunta e Presidente di Conseho Electoral, ta e Presidente di Corte di Husticia.
Esaki ta un indicacion di e posicion cu Frederick Nuboer a ocupa como Presidente Interino di Algemene Rekenkamer Aruba.
Pa Parlamento por cumpli cu su trabou, e ta depende di e asistencia cu e ta ricibi di Algemene Rekenkamer Aruba, cu mester duna publicidad na tur su documentonan y trabou pa sostene e funcionamento di Parlamento di Aruba.
Algemene Rekenkamer Aruba ta encarga cu e ciclo oficial pa Gobierno gasta placa, cu ta cuminsa cu presupuesto.
Oficialmente e unico documento cu ta wordo considera legal pa e gastonan y entradanan di Aruba, ta e asina yama “jaarrekening”, cuenta anual, cu ta copilacion oficial di tur entrada y gasto cu Aruba tabata tin durante un aña y cu ta wordo controla dor di Algemene Rekenkamer Aruba, pa wordo finalmente aproba dor di Parlamento como cifranan real di Aruba.
Kico un “jaarrekening’ por haci, a keda comproba den e caso Fondo Desaroyo Nobo San Nicolas contra cuatro Ministro di AVP.
Tres a wordo condena. Ex Prome Ministro Henny Eman a sali liber pa e hecho cu su abogado a demostra cu no tabata tin cuenta anual pa e temporada mara na e acusacion oficial.
Awe Aruba, mester yega na un acuerdo cu Hulanda pero tambe den un pandemia mester subi un rumbo den cual Integridad ta base di e normal nobo.
Den Parlamento tin Benny Sevinger, cu ta acusado cu mester presenta dilanti Huez. Awe e e Presidente di Algemene Rekenkamer Aruba a comporta su mes na un forma cu el a wordo detene.
Awe Aruba atrobe ta den noticia na un momento crucial pa e pais cu den circumstancia dificil mester por confia ciegamente riba integridad y e imagen cu cada representante di e pais, ta presenta na mundo!
