ORANJESTAD (AAN): Ex Prome Minister di Aruba Evelyn Wever-Croes ta felicita sr. Pik Pisas y MFK cu ta cla pa wordo huramenta.
“E proceso di screening na Curaçao a finalisa despues di 10 siman cu tabata tin eleccion na Curaçao y e candidatonan pa Minister ta cla pa huramenta den gabinete Pisas 3.
Cu Dios bendiciona e gobierno nobo di Curaçao, y cu Dios ilumina cada paso di e ministernan pa por sigui traha den bienestar di pais Curaçao.
Tin retonan geopolitico serio nos dilanti y mi ta spera cu Aruba y Curaçao por sigui traha hunto pa enfrenta esakinan, pasobra hunto nos ta mas fuerte. Pabien na mi amigo Pik Pisas y hopi exito”, ta palabranan di Evelyn Wever-Croes.
Remarcabel ta cu na Curacao a apunta un solo formador, manera ta usual, y den 10 siman despues di eleccion a keda cla cu e proceso di screening.
Na Aruba, ta 25 siman (6 luna) despues di eleccion y ainda e proceso di screening no ta cla. Ohala e siman aki pueblo bin un finalisacion di esaki pa asina Aruba tin un gabinete completo.
