Segun Profesor Jose Ernesto Mancera:
*Nan por intoxica pisca y incluso por causa morto
ORANJESTAD (AAN) “Tin un syndrome cu ta hopi comun den Caribe, cu yama ‘Ciguatera’. Pa suerte e no mata hopi hende, pero si ta genera problemanan grave”, asina profesor Jose Ernesto Mancera, di Universidad di Colombia, a menciona den entrevista cu DIARIO.
Esaki den contexto di e Conferencia ICMS cu a tuma lugar na Universidad di Aruba 26 y 28 di Mei cu a pasa, relaciona cu lama Caribe y e aumento di alganan dañino den lama.
Mancera a sigui splica cu e “problemanan cu por genera ta tanto na nivel di salubridad publico, como tambe na nivel di pesca, aquaculture, y turismo. Kiermen, e ta genera problema na nivel economico. “Loke IOCARIBE a bin ta haciendo, ta pone e problema aki na conocemento di henter Caribe, pa por atende cu ne”, Profesor Mancera a duna di conoce.
Mancera a bisa cu den region di Caribe mester di hopi mas informacion. “Mester comunica e hendenan, no solamente di sector di salud publico, sino tambe e sector di turismo, tocante e problemanan aki. No pa tin miedo sino pa enfrenta nan, pa un turista Mericano of Europeo, por bin cu trankilidad consumi un bon pisca na Aruba, pa e no wordo shiwata, manera a sosode den otro lugarnan.
“Mi ta kere cu loke nos mester bisa ta cu nos tin e problema, pero si nos ta maneh’e bon, tambe nos por haya e solucion.
“Awo, for di e Academia kico ta locual ta ser pidi? Un poco mas di apoyo pa por haci e investigacionnan, pa por conoce e agentenan ey, e microalganan cu genera e problemanan, pero tambe pa conoce mas di e agentenan toxico, di e diferente toxinanan cu tin den nos awanan”, profesor Mancera a señala.
El a señala cu esaki ta un problema cu semper a existi. For di e Bijbel mes tin registronan cu ora e lama cora ta pone, nos como ser humano a acelera un poco mas e problema cu e incremento di nutrientenan den e awa. Y, e maneho, tambe ta depende hopi di nos mes. Talves genera sistemanan di alerta trempan cu por permiti nos detecta e problema na tempo”, Profesor Jose Ernesto Mancera Pineda a enfatiza pa conclui.
