"Mi ta inocente" --- ORANJESTAD (AAN): Ex parlamentario y lider di Partido Por, Alan Howell a wordo deteni den oranan di mainta y transporta na oficina di Landsrecherche relaciona cu e investigacion di Caso Diamante.
E ex parlamentario ta bao di sospecha di falsificacion y malversacion di fondonan di fraccion di POR.
Howell a yega di defende su hechonan, alegando cu supuestamente e placa di voorschot cu el a saca di e fondo por a causa un redflag na MOT.
El a haya un carta di Landsrecherche splicando cu ta bay haci un investigacion riba e fondo di fraccion di POR, y tambe ta pone beslag riba un cuenta bancario personal di Howell. Den su opinion e carta di Ministerio Publico tabata un show.
Aparentemente tur luna fraccion di POR ta haya 15.000 Florin na nan disposicion pa wordo usa. Segun Howell door di haci cierto transaccion, esaki a crea un MOT Melding.
Howell a fungi como lider di fraccion di Partido POR den Parlamento den e periodo 2017-2021
No por keda sin menciona cu den luna di September, autoridadnan a drenta dos adres relaciona cu Caso Diamante.
Ministerio Publico ta sigui cu nan investigacion extenso di malversacion di fondonan publico.
Riba potret, por a wak momento cu Alan Howell tabata saliendo geboei for di Oficina di Landsrecherche. Na su salida el a expresa: "Mi ta inocente".
https://diario.aw/categories/noticia/general/ex-parlamentario-alan-howell-deteni#sigProIdfed9301225
