Ora papia di Ex Ministro Hyacinto, Rudy, Croes, ta papia di uno di e nacionalistanan mas ferviente cu mundo politico di Aruba a conoce.
E forma cu e tabata su presenta su opinionnan riba asuntonan estatal di Aruba, no tabata laga lugar a duda.
Su posicion firme tabata basa riba libertad di Aruba, cu el a defende for di momento cu el a haci su entrada den mundo politico di Aruba.
Ora uni e declaracionnan di Rudy Croes enfrente e libertad cu e kier a mira pa Aruba, ta topa cu sosten firme pa e lucha cu su ruman Betico Croes a hiba y cu a resulta den e Status Aparte di Aruba.
Na su forma, Rudy Croes a lucha pa algo mas cu un salida di Aruba di e constelacion Antiano y autonomia di su isla natal.
Rudy Croes tabata kere den libertad, manera tabata bini dilanti den tur su expresionnan.
El a sirbi Aruba como Ministro di Justicia den e Gabinetenan di Nelson Oduber y den e posicion aki, sigur a recorda Hulanda cu Status Aparte tabata e anhelo mucho mas grandi cu solamente un lugar den Reino.
E contenido di autonomia di Aruba pa Rudy Croes hamas por a bandona e realidad di partnernan igual den Reino Hulandes.
Autonomia pa Rudy Croes tabata mara na libertad di e pais cu pa Rudy Croes no por tabata suheto na e pensamento Hulandes, manera e tabata trece dilanti.
Historico tabata su confrontacionnan cu politiconan Hulandes tanto como Ministro como Miembro di Parlamento di Aruba.
Tabata tin momento cu DIARIO no tabata di acuerdo cu su ponencianan cu e no tabata duna e toke politico, pa evita cu nan lo por a parce extremo.
Tabata tin momento cu el a sorprende ora na su forma, e tabata presenta su posicion na politiconan Hulandes, cu sigur lo no lubida su actitud fuerte enfrente e libertad di Aruba pa mantene legitimidad Arubano.
Pa por a comprende e politico Rudy Croes, sigur mester a scucha e musico Rudy Croes como parti di e grupo musical Grupo Betico, cu tabata cera mundo conoci cu loke a biba den e circulo familiar di Betico y Rudy Croes.
“Arubiano” tabata e palabra cu ta bini dilanti ora e musica di Aruba produci pa Grupo Betico resona.
E tradicionnan, e orguyo, e anhelo pa libertad y pa mantencion di e caracter propio di Aruba ta bini dilanti.
Rudy Croes tabata un luchador ferviente. Un luchador cu a lucha contra uno di e enfermedadnan mas cruel, cu ta cancer.
Diasabra e noticia a alcansa Pueblo di Aruba, cu el a fayece.
Nos ta despedi di un politico, di un guerero pa e causa di Aruba.
Nos palabranan di condolencia na su señora Damia Croes y su cuatro yiunan, tur su miembronan di famia y amigonan.
Cu su alma descansa na paz.
