Awe Mike kier hunga cu e berdad cu Hulanda a splica for di 2014 --- *Mike a bira un payaso den Reino ora Hulanda a presenta su as --- *Aruba a perde su autonomia cu atrobe e partido di Mike a traiciona
ORANJESTAD(AAN)—Kende ta doño di e placa y pertenencia di e pais?
Esaki ta e pregunta cu a haya un contesta dia 11 di Juli 2014, ora den Staatscourant Hulandes a sali e publicacion di e final di e autonomia financiero di Aruba.
Na cualkier pais democratico, for di 2014, Mike Eman lo a splica Aruba cu e ta retira despues cu den un solo termino di gobernacion, el a logra deshaci di e Status Aparte di Aruba pa cual tanto e pais a lucha.
Mike Eman ta sigur uno di e personanan cu mester ta na haltura di loke Status Aparte ta nifica pa e Pueblo di Aruba.
No ta Betico Croes y a grupo di personanan cu a lucha pa Status Aparte a conoce e gloria di e logro grandi. Ta e grupo di Mike Eman a gosa for di Prome di Januari 1986 di e beneficio di wordo yama e prome Gobierno di e pais Aruba, cu Betico Croes a logra.
Na e momento Aruba no por a mira kico Mike lo a logra pa Aruba cu na 2021 e kier bolbe yena cu angustia politico den otro intento pa e haya poder.
Awe Mike Eman den su ansia di morto pa haya poder y como Prome Ministro bolbe haya oportunidad pa destrui Aruba, ta hunga otro di su famoso comedianan politico cu mester produci probecho personal pa su persona.
Ta cu asombro por scucha Mike Eman bisa, cu Evelyn Wever-Croes ta haci loke Hulanda kier pa e haci.
E pregunta grandi cu Mike Eman mester contesta cu berdad ta, pakico Evelyn Wever-Croes y tur gobierno cu sinta na Aruba, mester tene na loke Hulanda bisa na consideracion.
Na Hulandes tin tres palabra cu ta splica bon cla, pakico Evelyn Wever-Croes y cualkier gobernante Arubano awe of den basta tempo, mester tene na consideracion loke Hulanda ta bisa.
Wie betaalt, bepaalt! (Esun cu paga, ta dicidi.)
Mike Eman ta bon na haltura kico a pasa cu Hulanda a haya e oportunidad cu Statuut ta brinda, pa pone un fin na e autonomia financiero di Aruba.
Tabata pa motibo di Mike Eman, cu Hulanda a bini Aruba pa splica cu Hulanda ta dicidi.
Con Hulanda por a haci esaki? Simplemente Hulanda a tene su mes na Statuut y a pone su as riba mesa y a mustra Mike riba exigencianan di bon gobernacion di un pais segun Statuut.
Ministro Plasterk a pone e as di Statuut riba mesa y a splica Mike cu “Wie betaalt, bepaalt”. Punto.
Mike a bay sconde den Fort Zoutman caminda el a haci su mes y Aruba ridiculo cu su welga di hamber pa sconde e forma cu el a mata Statuut.
For di 2013, ora cu un cantidad di mentira sin misericordia, el a bolbe gana eleccion, e tabata na haltura cu Hulanda mester tabata na caminda pa pone fin na su fiesta.
Esaki ta loke a pasa dia 11 di Juli 2014, ora como estadista Plasterk a pone e as di Hulanda riba mesa y Mike como payaso mester a baha for di Fort Zoutman pa e entrega Hulanda e autonomia financiero di Aruba.
For di e momento Hulanda a keda cu e derecho pa dicidi kico ta pasa financieramente cu Aruba, cu a keda bou supervision di Hulanda.
E situacion a empeora ora Mike Eman na Cuba a busca un solucion pa su problemanan cerca Nicolas Maduro y a trece Citgo, cu a costa Aruba mas placa pero tambe a laga atras un historia di corupcion cu awor como Rapport di Refineria di Aruba, ta den man di Ministerio Publico.
Di kico Mike ta papia awe? No ta Hulanda mester pone placa riba mesa pa evita cu Mike lo a laga Aruba zink?
Raymond Knops a admiti cu Aruba a bati bancarota na man di Mike Eman y cu Evelyn Wever-Croes ta tene su mes na regla di bon gobernacion.
Aruba a bira victima di un traicion mas di e partido di Mike Eman, cu no por biba sin Aruba cu durante epoca di Emanismo a core e riesgo di bira un circo cu un payaso den Fort Zoutman, un centro di corupcion gubernamental cu a haci prison e hotel mas conoci na Aruba.
Pa conclui ora mira e realidad y berdad, Mike Eman a dicidi for di 2014 cu Evelyn Wever-Croes mester haci loke Reino bisa, pasobra ta placa di Reino a evita cu Mike a zink Aruba.
