Recientemente, señora Marisol Tromp a yega na Colegio Arubano pa asina duna les special na e alumnonan cu tin Geschiedenis y Staatsinrichting den nan pakete.
E gruponan di H5gs-1, H5gs-3. H5gs-4, H5gs-5, y V6gs-6 a disfruta e dia aki di un les special interesante ofreci door di señora Tromp, unda e alumnonan por a conoce di cerca e funcionamento practico di e sistema politico di Aruba, como preparacion pa nan examen di scol, esta SE-1 riba e sistema politico di e isla.
E lesnan a enfoca principalmente riba e funcion y e rol cu Sra. Tromp a yega di fungi den pasado, manera President di Parlamento, Parlamentario, y Ministro, como tambe su experiencia practico cubriendo e departamentonan aki.
Tambe a bay riba e experencia durante eleccionnan na Aruba (cu atencion special pa cu debatenan live na TV), y tambe e reunion cu Parlamentarionan di otro paisnan di Reino, y pakico esaki ta hopi importante.
Señora Marisol Tromp ta ex-alumno di Colegio Arubano (den VWO), y e dia aki na Colegio Arubano el a haya hopi interesante. E alumnonan tambe a haya esaki hopi interesante, y esaki por a conclui for di e cantidad di pregunta cu nan a haci, y na final e potretnan selfie cu nan a saca cu ne.
