Ex-Ministro contento cu Gobierno lo sigui cu ‘Baki den Bario’

Campaña nacional ‘Limpi Limpi’ ta exitoso

• Spera di lo keda stimula separacion di desperdicio

ORANJESTAD (AAN): Gobierno ta continuacion, esey ta e standard cu nos a set desde september 2021 y ta contento pa mira cu e ta wordo aplica den e siguiente Gabinete. Baki den Bario ta un iniciativa di e campaña nacional di limpi limpi, unda cu ministerio a trece mas cu 10 partners for di sector publico y priva pa hunto traha diasabranan largo, desde mardruga pa bin prepara e bakinan, e structura cu a prepara di antemano di localidad pa localidad.

   Despues di 25 baki den bario, e iniciativa tin su framework, e logistica y structura a wordo traspasa exitosamente pa BCI y Gabinete nobo por sigui organisa esakinan pa comunidad di Aruba.

   Ex-Ministro Ursell Arends a duna palabra di gradicimento pa tur cu a yuda y mas importante pa traha hunto pa sigui haci Baki den Bario posibel. Tambe ta spera cu Gabinete actual keda stimula separacion di desperdicio, mirando cu esaki ta reduci contaminacion ambiental y ta yuda e procesamento responsabel di materialnan.

   Hecho ta cu awor Aruba a bira un lider regional den maneho di desperdicio, y a bira e prome isla den Caribe Hulandes pa exitosamente cera e Dump habri, y pasa pa un sistema mas structura y sostenibel.  Otro islanan den Caribe mes a bin te na Aruba pa haya sa con ta procesa desperdicio pa elimina dependencia di landfill, tambe encurasha sector di maneho di desperdicio, pa crea oportunidadnan pa recycling y negoshinan di sostenibilidad.  Tambe ta desaroya strategianan di waste management basa riba informacion historico y actual.

   Aruba den pasado tabatin hasta 31 lugar di dump ilegal, awor esaki a reduci te na como 6 pa 7 lugar.  Esaki nifica cu pa varios decada, e lugarnan ey a wordo yena cu sushi, siendo cu e dump di Parkietenbos tabata habri.  Esaki ta demostra cu maneho di desperdicio no ta djis encuanto infrastructura, pero tambe pa cambia actitud y balor den comunidad.  Speranza tey cu e proyecto di Limpi Limpi lo sigui yuda cu tur esey.